‘ఉస్తాద్ భగత్ సింగ్’ ట్రైలర్ అప్డేట్.. సోషల్ మీడియాలో సెన్సేషన్ క్రియేట్ చేస్తున్న కొత్త పోస్టర్!

దిశ, సినిమా: పవర్ స్టార్ పవన్ కళ్యాణ్ అభిమానులు ఎప్పుడెప్పుడా అని ఎదురుచూస్తున్న మాస్ యాక్షన్ ఎంటర్టైనర్ ‘ఉస్తాద్ భగత్ సింగ్’ నుండి అదిరిపోయే అప్‌డేట్ వచ్చేసింది. ‘గబ్బర్ సింగ్’ వంటి ఇండస్ట్రీ హిట్ తర్వాత పవన్ కళ్యాణ్ - హరీష్ శంకర్ కాంబినేషన్‌లో వస్తున్న సినిమా కావడంతో దీనిపై అంచనాలు ఆకాశాన్ని తాకుతున్నాయి. తాజాగా ఈ సినిమా ట్రైలర్ రిలీజ్ డేట్‌ను మేకర్స్ అఫీషియల్‌గా ప్రకటించారు. పవర్ స్టార్ పవర్ ఫుల్ లుక్‌తో కూడిన పోస్టర్‌ను విడుదల చేస్తూ, మార్చి 14న ట్రైలర్‌ను లాంచ్ చేయబోతున్నట్లు చిత్రబృందం వెల్లడించింది. ఈ పోస్టర్‌లో పవన్ కళ్యాణ్ చేతిలో గన్ పట్టుకుని, స్టైలిష్‌గా కనిపిస్తూ ఫ్యాన్స్‌కు గూస్ బంప్స్ తెప్పిస్తున్నారు. "ఆయన వస్తున్నాడు.. రికార్డులు తిరగరాయడానికి సిద్ధంగా ఉండండి" అనే రేంజ్‌లో ఈ ట్రైలర్ అప్‌డేట్ సోషల్ మీడియాను ఊపేస్తోంది.

ఈ సినిమా షూటింగ్ పూర్తి చేసుకుని, ప్రస్తుతం పోస్ట్ ప్రొడక్షన్ పనుల్లో వేగంగా దూసుకుపోతోంది. అందరూ అనుకున్నట్లుగానే ఉగాది పండుగ కానుకగా ఈ చిత్రాన్ని ప్రపంచవ్యాప్తంగా థియేటర్లలో విడుదల చేయనున్నారు. ఇప్పటికే విడుదలైన రెండు పాటలు చార్ట్‌బస్టర్‌లుగా నిలవగా, మూడో సాంగ్ కూడా నేడు విడుదల కానుంది. దేవి శ్రీ ప్రసాద్ అందించిన మ్యూజిక్ ఈ సినిమాకు ప్రధాన ఆకర్షణగా నిలవబోతోంది. ఇక ఈ చిత్రంలో పవన్ కళ్యాణ్ సరసన శ్రీలీల, రాశీఖన్నా హీరోయిన్లుగా నటిస్తున్నారు. మైత్రీ మూవీ మేకర్స్ ఎక్కడా రాజీ పడకుండా ఈ సినిమాను భారీ బడ్జెట్‌తో నిర్మిస్తున్నారు. పవన్ కళ్యాణ్ పవర్‌ఫుల్ పోలీస్ ఆఫీసర్‌గా కనిపిస్తుండటంతో, థియేటర్లలో పూనకాలు రావడం ఖాయమని నెటిజన్లు ఆసక్తిగా ఎదురుచూస్తున్నారు.