ఆ సినిమా సెట్‌లో నన్ను బలవంతం చేశారు.. బెదిరించారంటూ చాందినీ చౌదరి షాకింగ్ కామెంట్స్

దిశ, సినిమా: ‘కలర్ ఫొటో’ సినిమాతో ఒక్కసారిగా తన రేంజ్ పెంచుకుని హీరోయిన్‌గా మారిపోయింది. ఆ తర్వాత పలు చిత్రాల్లో నటించిన చాందినీ చౌదరి(Chandini Chowdhury) పెద్దగా హిట్ అందుకోలేకపోయింది. ఇక ఇటీవల ‘సంతాన ప్రాప్తిరస్తు’ సినిమాతో వచ్చి ప్రేక్షకులను అలరిస్తోంది. తాజాగా, ఓ ఇంటర్వ్యూలో పాల్గొన్న చాందినీ తన జీవితంలో జరిగిన అనుభవాలను గుర్తు చేసుకుంది. ‘హౌరా బ్రిడ్జ్’ (Howrah Bridge)సినిమాలో ముద్దు సీన్స్ చేయాలని టీమ్ ఇబ్బంది పెట్టినట్లు చెప్పింది. ‘‘అప్పటికే ‘అర్జున్ రెడ్డి’(Arjun Reddy) విడుదల కావడంతో ముద్దు సీన్స్, రొమాంటిక్ సన్నివేశాలు ఉండటం వల్ల హిట్ అయిందనే టాక్ వచ్చింది.

దీంతో ‘హౌరా బ్రిడ్జ్’మూవీలో కూడా పెడితే పెద్ద హిట్ అవుతుందని భావించారు. దీంతో ముద్దు సన్నివేశాల్లో నటించాలని నన్ను బలవంతం చేశారు. మొదట స్టోరీ చెప్పినప్పుడు ఇవన్నీ నాకు వివరించలేదు. డైరెక్టర్ ఏం చెప్పినా చేయాలి లేదంటే చెడ్డ పేరు వస్తుందని అప్పుడు చాలా భయపడ్డాను. ఆ సమయంలో నా కాళ్లు చేతులు వణికిపోయాయి. సెట్‌లో షూట్ చేస్తుండగా.. దర్శకుడు, నిర్మాతతో పాటు కొంతమంది వచ్చి ముద్దు సీన్స్ చేయాలని ఒత్తిడి తెచ్చారు. చేయకుంటే.. ఈ సినిమా ఫ్లాప్ అయితే నీదే బాధ్యత అని బెదిరించారు.

అప్పుడు ఏం చేయాలో అర్థం కాలేదు. కానీ ఆ సమయంలోనే.. నాతో నటించిన నటుడిని కూడా టీమ్ అడిగారు. దీంతో ఆయన అమ్మాయి అనుమతి తీసుకోండని అన్నారు. కానీ వాళ్లు మాత్రం అమ్మాయిది ఏం లేదు.. చేయమంటే చేస్తుందని చెప్పారు. అయినప్పటికీ ఆయన ముద్దు సీన్స్‌లో నటించడానికి ఒప్పుకోలేదు. దీంతో నేను ఊపిరిపీల్చుకున్నాను’’ అని చెప్పింది. ఇక సినిమా పేరు చెప్పనప్పటికీ ఆ సమయంలో ‘హౌరా బ్రిడ్జ్’ చేసింది కాబట్టి వారే అయి ఉంటారని అంతా అభిప్రాయపడుతున్నారు.