త్రిష క్యారెక్టర్ గురించి ఆసక్తికర విషయాలు బయటపెట్టిన స్టార్ నటి ఖుష్భూ!

దిశ, సినిమా: కోలీవుడ్ స్టార్ హీరో, టీవీకే అధినేత విజయ్, స్టార్ హీరోయిన్ త్రిషల మధ్య ఉన్న రిలేషన్‌షిప్ గురించి గత కొంతకాలంగా నెట్టింట రచ్చ జరుగుతున్న సంగతి తెలిసిందే. ఈక్రమంలోనే.. వీరిద్దరూ కలిసి చెన్నైలో జరిగిన ఒక వివాహ రిసెప్షన్‌లో జంటగా కనిపించడంతో, ఆ రూమర్లకు మరింత బలం చేకూరినట్లయింది. అయినప్పటికీ వీరిద్దరు ఈ విషయంపై సైలెంట్‌గా ఉంటున్నారు. దీంతో వీరి రిలేషన్‌షిప్‌పై రోజుకో వార్త సోషల్ మీడియాలో వైరల్ అవుతోంది. తాజాగా, ఈ విషయంపై నటి, రాజకీయ నాయకురాలు ఖుష్బూ సుందర్ చేసిన వ్యాఖ్యలు ఇప్పుడు సోషల్ మీడియాలో హాట్ టాపిక్‌గా మారాయి.

త్రిషపై వస్తున్న విమర్శల గురించి ఖుష్బూ స్పందిస్తూ.. త్రిష తనకు చాలా సన్నిహితురాలని, ఆమె చాలా గౌరవప్రదమైన వ్యక్తి అని పేర్కొన్నారు. "మనం ఇప్పుడున్న పరిస్థితుల్లో చిన్న తుమ్ము తుమ్మినా ఎవరో ఒకరి మీద నింద వేస్తున్నారు. నాకు తెలిసినంత వరకు త్రిష చాలా హుందాగా ఉండే వ్యక్తి. ముఖ్యంగా నాకు తెలిసిన గొప్ప మహిళల్లో తను ఒకరు. ఆమె చాలా సున్నిత మనస్కురాలు" అని త్రిషకు అండగా నిలిచారు. సోషల్ మీడియాలో ఇతరుల వ్యక్తిగత జీవితాల గురించి కామెంట్స్ చేసే వారిపై ఖుష్బూ ఆగ్రహం వ్యక్తం చేశారు. పక్కవారి జీవితాల్లోకి తొంగి చూడటం ద్వారా కొందరు సాడిస్టిక్ ఆనందాన్ని పొందుతున్నారని మండిపడ్డారు.

ముంబైలో ఉండే ఈ సంస్కృతి ఇప్పుడు చెన్నైకి కూడా పాకిందని, పనికిమాలిన కామెంట్స్ చేసే వారికి సమాధానం ఇచ్చి మన సమయాన్ని వృధా చేసుకోవద్దని ఆమె పేర్కొన్నారు. కాగా.. విజయ్ భార్య సంగీత విడాకుల కోసం కోర్టుకెళ్లడం, తన భర్తకు ఒక నటితో ఎఫైర్ ఉందని పిటిషన్‌లో పేర్కొనడం ఇప్పుడు చర్చనీయాంశమైంది. 1999లో వివాహం చేసుకున్న ఈ జంటకు ఇద్దరు పిల్లలు ఉన్నారు. ప్రస్తుతం సంగీత చెన్నైలోని తమ ఇంట్లోనే ఉండేందుకు అనుమతి కోరుతూ మధ్యంతర ఉత్తర్వుల కోసం దరఖాస్తు చేసుకున్నారు. ఏజీఎస్ ప్రొడ్యూసర్ కల్పతి సురేష్ కుమారుడి వివాహ రిసెప్షన్‌లో విజయ్ - త్రిష జంటగా కనిపించిన తర్వాత ఈ వివాదం మరింత ముదిరింది.