శివకార్తికేయన్‌కు ఊహించని అనుభవం.. నా కుటుంబాన్ని వివాదాల్లోకి లాగుతున్నారంటూ షాకింగ్ కామెంట్స్

దిశ, సినిమా: కోలీవుడ్ స్టార్ హీరో శివకార్తికేయన్ (Sivakarthikeyan)తాజాగా ఓ ఈవెంట్‌లో చేసిన వ్యాఖ్యలు ఇప్పుడు హాట్ టాపిక్‌గా మారాయి. తనపై జరుగుతున్న ట్రోలింగ్ ఈసారి వ్యక్తిగత హద్దులు దాటిందని చెబుతూ ఆయన ఎమోషనల్ అయ్యాడు. ముఖ్యంగా తన కుటుంబాన్ని వివాదాల్లోకి లాగుతూ ఇబ్బంది పెడుతున్నారని చెప్పడం అందరినీ ఆశ్చర్యానికి గురి చేస్తోంది. తన కెరీర్‌లో ఎన్నో రకాల సైబర్ ఎటాక్స్‌ను ఎదుర్కొన్నానని, అవి చాలా వరకు ప్లాన్డ్‌, పెయిడ్ దాడులేనని శివకార్తికేయన్ వెల్లడించాడు. అయితే ఈసారి మాత్రం పరిస్థితి భిన్నమని అన్నాడు. తనను విమర్శించడమే కాకుండా తన కుటుంబ సభ్యులను టార్గెట్ చేయడం తీవ్ర మనస్తాపాన్ని కలిగించిందని చెప్పాడు.

ఈ ఘటన వల్ల ఇంట్లో అందరూ బాధపడ్డామని, ఆ క్షణాలు చాలా కఠినంగా గడిచాయని తెలిపారు. ఈ సమయంలో తన అమ్మ అడిగిన ప్రశ్నను గుర్తు చేసుకుంటూ ఆయన మరింత ఎమోషనల్ అయ్యాడు. “ఇలాంటి పరిస్థితుల్లో మనకు ఎవరున్నారు?” అని ఆమె అడిగిందని చెప్పాడు. అప్పుడు తాను తన అమ్మకు, తనను ప్రేమించే లక్షలాది మంది అభిమానులే తన బలం అని, ధైర్యంగా ఉండమని చెప్పానని పేర్కొన్నాడు. అయితే ఈ వివాదానికి కారణమైన అంశాన్ని మాత్రం ఆయన బయటపెట్టలేదు. ఇదిలా ఉండగా, శివకార్తికేయన్ మాట్లాడుతున్న సమయంలో విజయ్ అభిమానులు ‘తమిళగ వెట్రి కళగం’ అంటూ నినాదాలు చేయడం గమనార్హం.

‘పరాశక్తి’(Parashakti), ‘జననాయకన్’ సినిమాలు ఒకే సమయంలో రాబోతున్న నేపథ్యంలో అభిమానుల మధ్య టెన్షన్ పెరిగిందని, అందుకే ఇలా జరిగిందని టాక్ నడుస్తోంది. ఇక సినిమాల విషయానికి వస్తే.. శివకార్తికేయన్ త్వరలో ‘పరాశక్తి’ సినిమాతో ప్రేక్షకులను అలరించేందుకు సిద్ధమవుతున్నారు. సుధా కొంగర(Sudha Kongara) దర్శకత్వంలో తెరకెక్కుతున్న ఈ రాజకీయ నేపథ్య చిత్రం 1960ల మద్రాస్ నేపథ్యంలో సాగనుంది. హిందీ వ్యతిరేక ఉద్యమం చుట్టూ తిరిగే ఈ కథలో శ్రీలీల హీరోయిన్‌గా నటిస్తుండగా, రవి మోహన్, అథర్వ మురళి కీలక పాత్రల్లో కనిపించనున్నారు. జీవీ ప్రకాష్ సంగీతం అందిస్తున్న ఈ చిత్రం సంక్రాంతి కానుకగా జనవరి 10న థియేటర్లలో విడుదల కానుంది.

Read More..

జూనియ‌ర్ ఎన్టీఆర్ పై ట్రోలింగ్...కార‌ణం ఇదే !