ప్రీతి ముకుందన్ ప్రేమలో రోషన్.. అప్డేట్‌తో బిగ్ సర్‌ప్రైజ్ ఇచ్చిన మూవీ టీమ్

దిశ, సినిమా: టాలీవుడ్ సీనియర్ హీరో శ్రీకాంత్ తనయుడు రోషన్, ఇటీవల ‘ఛాంపియన్’ సినిమాతో బ్లాక్ బస్టర్ హిట్ అందుకొని ఫుల్ ఫామ్‌లోకి వచ్చిన సంగతి తెలిసిందే. ఇప్పుడు అదే జోరును కొనసాగిస్తూ, తన తదుపరి ప్రాజెక్ట్‌ను అధికారికంగా ప్రకటించారు. నేడు ప్రేమికుల దినోత్సవం (Valentine's Day) సందర్భంగా ఈ సినిమాకు సంబంధించిన క్రేజీ అప్‌డేట్ విడుదలైంది. ఈ కొత్త చిత్రానికి ‘ఏమో ఏమో ఇది’ (EmoEmoIdi )అనే ఆసక్తికరమైన టైటిల్‌ను ఖరారు చేశారు. వైవిధ్యమైన సినిమాలతో ఆకట్టుకునే దర్శకుడు శైలేష్ కొలను ఈ చిత్రాన్ని తెరకెక్కిస్తున్నారు. ఇందులో రోషన్ సరసన ‘కన్నప్ప’ సినిమాతో గుర్తింపు తెచ్చుకున్న ప్రీతి ముకుందన్ హీరోయిన్‌గా నటిస్తోంది.

‘ది ఫస్ట్ బ్రీజ్’ గ్లింప్స్

ఈ రొమాంటిక్ డ్రామాను ప్రముఖ నిర్మాణ సంస్థలు సితార ఎంటర్‌టైన్‌మెంట్స్, ఫార్చ్యూన్ ఫోర్ సినిమాస్, శ్రీకర ప్రొడక్షన్స్ సంయుక్తంగా నిర్మిస్తున్నాయి. ఈ సినిమా ప్రకటన సందర్భంగా విడుదల చేసిన ‘ది ఫస్ట్ బ్రీజ్’ గ్లింప్స్ ప్రేక్షకులను బాగా ఆకట్టుకుంటోంది. ఈ వీడియోలో రోషన్ లుక్ చాలా కొత్తగా, స్టైలిష్‌గా ఉంది. తన తల్లితో ‘సింగిల్‌’గా ఉండటం వల్ల కలిగే లాభాల గురించి, అమ్మాయిలు చాలా ‘డేంజర్’ అని రోషన్ వివరించే తీరు సరదాగా ఉంటూనే సినిమాపై ఆసక్తిని పెంచుతోంది. గ్లింప్స్ చివర్లో హీరోయిన్ ప్రీతి ముకుందన్ ఎంట్రీ చాలా అందంగా ఉంది. పాటలు వింటూ గులాబీ పూల తోట ముందు కూర్చున్న ఆమెను చూసి రోషన్ ఫిదా అయిపోతాడు. అదే సమయంలో రోషన్‌ను చూసి ప్రీతి సిగ్గుపడటం చూస్తుంటే, ఈ ఇద్దరి మధ్య కెమిస్ట్రీ సినిమాలో హైలైట్ కానుందని అర్థమవుతోంది. మొత్తానికి, ఒక మంచి లవ్ స్టోరీతో రోషన్ మళ్ళీ ప్రేక్షకులను పలకరించబోతున్నారని అర్థమవుతోంది. షూటింగ్ శరవేగంగా జరుపుకుంటున్న ఈ చిత్రం ఈ ఏడాది దసరా కానుకగా రాబోతుంది.

నాపై చాలా విమర్శలు వచ్చాయి.. చాలా కష్టంగా అనిపించింది: ఐశ్వర్య రజినీకాంత్