పూజా హెగ్డే ఊహించింది నిజమైంది.. ‘జన నాయగన్’ సెట్స్‌లోనే విజయ్ విజయాన్ని పట్టేసిన బుట్టబొమ్మ

దిశ, సినిమా: కోలీవుడ్ స్టార్ హీరో దళపతి విజయ్ వెండితెరపైనే కాదు, ఇప్పుడు రాజకీయ రంగంలోనూ తన సత్తా చాటి సరికొత్త చరిత్ర సృష్టించారు. రెండేళ్ల క్రితం ఆయన స్థాపించిన ‘తమిళగ వెట్రి కళగం’ (TVK) పార్టీ, తాజాగా జరిగిన తమిళనాడు అసెంబ్లీ ఎన్నికల్లో అద్భుత విజయాన్ని అందుకుంది. ఏ పార్టీతోనూ పొత్తు లేకుండా, ఒంటరి పోరాటం చేసి విజయ్ సాధించిన ఈ విజయం ఇప్పుడు దేశవ్యాప్తంగా చర్చనీయాంశమైంది. ఈ ఘనవిజయంతో తమిళనాడు తదుపరి ముఖ్యమంత్రిగా విజయ్ బాధ్యతలు చేపట్టబోతుండటం అందరినీ ఆశ్చర్యానికి గురి చేస్తోంది. విజయ్ ముఖ్యమంత్రి అవుతారనే విషయాన్ని స్టార్ హీరోయిన్ పూజా హెగ్డే ముందే ఊహించడం ఇప్పుడు సోషల్ మీడియాలో హాట్ టాపిక్‌గా మారింది. వీరిద్దరూ కలిసి నటించిన తాజా చిత్రం ‘జన నాయగన్’ షూటింగ్ సమయంలో ఒక సరదా సంభాషణ జరిగింది. రాబోయే ఎన్నికల్లో ఎవరు గెలుస్తారు? అన్న ప్రశ్నకు పూజా హెగ్డే ఏమాత్రం తడబడకుండా విజయ్ వైపు చూపిస్తూ, ఈయనే గెలుస్తారు అని నవ్వుతూ సమాధానం ఇచ్చింది. అప్పట్లో కేవలం సరదాగా అనిపించిన ఆ మాటలు, నేడు అక్షరాలా నిజం కావడంతో పూజా హెగ్డే తన సంతోషాన్ని వ్యక్తం చేశారు. "విజయ్ సార్ సీఎం అవుతారని నేను ముందే ఊహించాను.. మీ కలలు నిజం కావాలి" అంటూ ఆమె పెట్టిన పోస్ట్ ఇప్పుడు వైరల్ అవుతోంది.

మరోవైపు, విజయ్ అభిమానులు ఒక ఆసక్తికరమైన విషయాన్ని వెలికితీశారు. ఆయన గతంలో నటించిన ‘గోట్’ (The GOAT) సినిమాలో ఒక కారు నెంబర్ ప్లేట్ మీద “TN 07 CM 2026” అని ఉంటుంది. అప్పట్లో అది కేవలం ఒక నెంబర్ ప్లేట్ అనుకున్నా, ఇప్పుడు 2026లో విజయ్ నిజంగానే సీఎం అవుతుండటంతో అభిమానులు ఆశ్చర్యపోతున్నారు. విజయ్ తన రాజకీయ భవిష్యత్తును అప్పుడే ఆ నెంబర్ ద్వారా హింట్ ఇచ్చారని, దళపతి ప్లానింగ్ అంటే అలా ఉంటుందని ఫ్యాన్స్ పండగ చేసుకుంటున్నారు. రాజకీయాలపై పూర్తిస్థాయిలో దృష్టి పెట్టేందుకు విజయ్ సినిమాలకు స్వస్తి పలుకుతున్నట్లు ఇప్పటికే ప్రకటించారు. ఇది ఆయన అభిమానులకు కొంత బాధ కలిగించే విషయమే అయినా, ఒక గొప్ప నాయకుడిగా ఆయన సేవలు అందుతాయని వారు ఆశిస్తున్నారు. విజయ్ కెరీర్‌లో చివరి చిత్రంగా రాబోతున్న ‘జన నాయగన్’ చూసేందుకు ప్రేక్షకులు ఎంతో ఆసక్తిగా ఎదురుచూస్తున్నారు. వెండితెరపై దళపతిగా అలరించిన ఆయన, ఇప్పుడు ప్రజా నాయకుడిగా ఎలాంటి పాలన అందిస్తారో చూడాలని అందరూ ఆశిస్తున్నారు.