హీరోయిన్ల డ్రెస్సింగ్ వివాదంపై స్పందించిన శివాజీ.. నా వాళ్లే నన్ను ముంచారంటూ ఎమోషనల్ కామెంట్స్

దిశ, సినిమా: నటుడు శివాజీ (Shivaji)ఇటీవల ‘దండోరా’ (Dandora)ఈవెంట్‌లో హీరోయిన్ల వస్త్రధారణపై చేసిన వ్యాఖ్యలు పెను వివాదానికి దారితీసిన సంగతి తెలిసిందే. ఈ విషయంలో మహిళా కమిషన్ నుంచి హెచ్చరికలు, నెటిజన్ల నుండి విమర్శలు ఎదుర్కొన్న శివాజీ, తాజాగా ఒక ఇంటర్వ్యూలో ఆ ఘటనపై స్పందిస్తూ ఎమోషనల్ అయ్యారు. తన వల్ల తప్పు జరిగిందని అంగీకరిస్తూనే, ఆ సమయంలో తాను అనుభవించిన మానసిక వేదనను పంచుకున్నారు. ‘‘డ్రెస్సింగ్ గురించి మాట్లాడేటప్పుడు నేను రెండు పదాలు వాడాను. నిజానికి ఆ పదాలు వాడకుండా ఉండాల్సింది. నేనెప్పుడూ మాట తూలే వ్యక్తిని కాదు, కానీ ఆరోజు అలా ఎందుకు మాట్లాడానో ఇప్పటికీ అర్థం కావడం లేదు. అన్ని రోజులు మనవి కావు కదా! ఆ వ్యాఖ్యల తర్వాత నేను చాలా మానసిక సంఘర్షణకు గురయ్యాను. ఏకంగా మూడు రోజులు నిద్ర కూడా పోలేదు’’ అంటూ ఆవేదన వ్యక్తం చేశారు.

గతంలో వందల కొద్దీ డిబేట్లలో పాల్గొన్నా ఎప్పుడూ ఇలాంటి తప్పు చేయలేదని ఆయన గుర్తు చేసుకున్నారు.ఈ వివాదం మహిళా కమిషన్ వరకు వెళ్లినప్పుడు జరిగిన ఒక చేదు అనుభవాన్ని శివాజీ బయటపెట్టారు. ‘‘నేనే స్వయంగా మహిళా కమిషన్ దగ్గరకు వెళ్ళినప్పుడు, నాకు బాగా తెలిసిన వాళ్లే నాపై ఫిర్యాదు చేశారని తెలిసి షాక్ అయ్యాను. నా వాళ్లే నన్ను ముంచారని తెలిసి చాలా బాధపడ్డాను. అయితే వాళ్ల పేర్లు నేను బయటపెట్టను. వాళ్లంటే నాకు ఇప్పటికీ గౌరవం ఉంది’’ అని ఆయన చెప్పుకొచ్చారు. శివాజీ వ్యాఖ్యలపై అప్పట్లో అనసూయ, చిన్మయి వంటి సెలబ్రిటీలు గట్టిగా కౌంటర్లు ఇచ్చారు. శివాజీ క్షమాపణలు చెప్పిన తర్వాత వివాదం సర్దుమణిగినట్లు కనిపించినా, తాజా ఇంటర్వ్యూతో ఈ అంశం మళ్ళీ సోషల్ మీడియాలో హాట్ టాపిక్‌గా మారింది. తప్పును ఒప్పుకుని ఎమోషనల్ అయిన శివాజీ తీరుపై నెటిజన్లు రకరకాలుగా స్పందిస్తున్నారు.