తల్లి అయిన తర్వాత జీవితం చాలా మారింది.. ఇప్పుడు అవన్నీ పట్టించుకోనంటూ కియారా షాకింగ్ కామెంట్స్..

దిశ, సినిమా: బాలీవుడ్ స్టార్ హీరోయిన్ కియారా అద్వానీ(Kiara Advani) తెలుగు, హిందీ చిత్రాల్లో నటించి అతి తక్కువ కాలంలోనే టాప్ హీరోయిన్ల జాబితాలో తనకంటూ ప్రత్యేక స్థానం సంపాదించుకుంది. గ్లామర్‌తో పాటు నటనకు ప్రాధాన్యం ఉన్న పాత్రలను ఎంచుకుంటూ వరుస హిట్స్‌తో కెరీర్‌ను పీక్స్‌కు తీసుకెళ్లింది. అదే సమయంలో హిందీలోనూ స్టార్ హీరోల సరసన నటిస్తూ బాలీవుడ్‌లోనూ తన మార్క్ చూపించింది.కెరీర్ పీక్స్‌లో ఉండగానే బాలీవుడ్ హీరో సిద్ధార్థ్ మల్హోత్రా(Sidharth Malhotra)తో కలిసి ‘షేర్షా’ సినిమాలో నటించింది కియారా. ఆ సినిమా షూటింగ్ సమయంలోనే ఇద్దరి మధ్య స్నేహం ప్రేమగా మారింది. కొన్నేళ్ల పాటు రిలేషన్‌షిప్‌లో ఉన్న ఈ జంట 2023లో పెద్దల సమక్షంలో వివాహ బంధంతో ఒక్కటయ్యారు. వీరి పెళ్లి బాలీవుడ్‌లో అప్పట్లో హాట్ టాపిక్‌గా నిలిచింది. పెళ్లి తర్వాత కూడా సినిమాల్లో కొనసాగుతూ కియారా తన స్టార్‌డమ్‌ను మరింత పెంచుకుంది.ఈ ఏడాది హృతిక్ రోషన్‌తో కలిసి నటించిన ‘వార్ 2’లో కియారా కీలక పాత్రలో కనిపించింది. అదే సమయంలో తాను తల్లి కాబోతున్నట్లు ప్రకటించి అభిమానులకు గుడ్ న్యూస్ చెప్పింది. గర్భధారణ కారణంగా సినిమాలకు కాస్త గ్యాప్ తీసుకున్న కియారా జూలై 15న ఆడబిడ్డకు జన్మనిచ్చింది. ఆ పాపకు సారయా మల్హోత్రా అని పేరు పెట్టినట్లు ప్రకటించింది.

ప్రస్తుతం మాతృత్వాన్ని పూర్తిగా ఆస్వాదిస్తూ ఇంట్లోనే గడుపుతోంది. ఇదిలా ఉండగా.. కియారా డెలివరీ అయిన నెల రోజుల్లోనే ‘వార్ 2’ సినిమా థియేటర్లలో విడుదలైంది. ఈ సినిమాలో ఆమెపై చిత్రీకరించిన బికినీ పాట సోషల్ మీడియాలో సంచలనం సృష్టించింది. గర్భధారణకు ముందే ఆ పాటను షూట్ చేసినప్పటికీ.. ఆ సీన్‌పై నెటిజన్లు విపరీతంగా స్పందించారు. తాజాగా ఇచ్చిన ఓ ఇంటర్వ్యూలో ఆ బికినీ షాట్ కోసం తాను ఎంతగా కష్టపడ్డానో కియారా వెల్లడించింది. ‘‘బికినీ షాట్ కోసం ఫిట్‌గా ఉండేందుకు చాలా శ్రమించాను. కానీ డెలివరీ తర్వాత నా శరీరం పూర్తిగా మారిపోయింది. మొదట మళ్లీ పాత షేప్‌లోకి రావాలనే ఆలోచన వచ్చింది. కానీ ఆ తర్వాత ఒక విషయం అర్థమైంది. ఇక్కడ బెస్ట్ బాడీ ఉండటం ముఖ్యం కాదు. ‘వావ్.. నువ్వు ఒక మనిషిని సృష్టించావు’ అని నా శరీరాన్ని చూసి గర్వంగా అనిపించింది. ఇప్పుడు నేను ఏ సైజులో ఉన్నా, ఎలా ఉన్నా పట్టించుకోను. నా శరీరాన్ని నేను గౌరవిస్తాను. మాతృత్వం నాకు ఈ విషయాన్ని నేర్పింది’’ అంటూ ఆమె చేసిన వ్యాఖ్యలు వైరల్ అవుతున్నాయి. దీంతో కియారా త్వరలోనే సినిమాల్లోకి రీఎంట్రీ ఇస్తుందా? లేక మరికొంతకాలం విరామం తీసుకుంటుందా? అనే చర్చ మొదలైంది.