సమ్మర్ రేసులో ‘కట్టలాన్’.. దుషారా విజయన్‌కు ఈ సినిమానైనా హిట్ ఇస్తుందా?

దిశ, సినిమా: గ్లామర్ కంటే పెర్ఫార్మెన్స్‌కు ప్రాధాన్యత ఇచ్చే దుషారా విజయన్, గత కొద్దికాలంగా సరైన సక్సెస్ లేక ఇబ్బంది పడుతోంది. గత ఏడాది వచ్చిన ‘వీర ధీర సూరన్-2’ బాక్సాఫీస్ వద్ద ఆశించిన ఫలితాన్ని ఇవ్వకపోయినా, ఆమె నటనకు మాత్రం మంచి మార్కులే పడ్డాయి. వరుస పరాజయాలు పలకరిస్తున్నా, దుషారా టాలెంట్‌ను నమ్మి భారీ ప్రాజెక్టులు ఆమె తలుపు తడుతున్నాయి. ప్రస్తుతం దుషారా ఆశలన్నీ తన తదుపరి పాన్ ఇండియా చిత్రం ‘కట్టలాన్’ పైనే ఉన్నాయి. మలయాళ యాక్షన్ స్టార్ ఆంటోనీ వర్గీస్ హీరోగా నటిస్తున్న ఈ హై-వోల్టేజ్ యాక్షన్ థ్రిల్లర్, సౌత్ ఇండియాలోని అన్ని ప్రధాన భాషల్లో విడుదల కాబోతోంది. రవి బస్రూర్, అజనీష్ లోక్‌నాథ్ వంటి దిగ్గజ సంగీత దర్శకులు ఈ సినిమాకు పనిచేస్తుండటంతో అంచనాలు ఆకాశాన్ని తాకుతున్నాయి. క్యూబ్స్ ఎంటర్‌టైన్‌మెంట్స్ బ్యానర్‌పై భారీ బడ్జెట్‌తో రూపొందిస్తున్న ఈ సినిమాలో టాలీవుడ్ వెర్సటైల్ యాక్టర్ సునీల్, కబీర్ దుహన్ సింగ్, సిద్ధిక్ కీలక పాత్రల్లో నటిస్తున్నారు.

తాజాగా ఈ మూవీ విడుదల గురించి దుషారా విజయన్ ఒక ఆసక్తికరమైన హింట్ ఇచ్చింది. ఈ చిత్రం సమ్మర్ కానుకగా మే నెలలో థియేటర్లలోకి రాబోతున్నట్లు ఆమె తెలిపింది. అయితే, మే నెలలో ఏ తేదీన సినిమాను విడుదల చేస్తారనే విషయాన్ని మాత్రం చెప్పకుండా సస్పెన్స్ మెయింటైన్ చేస్తోంది. దుషారా ఈ సినిమాపై చాలా నమ్మకంగా ఉంది. ఈ పాన్ ఇండియా మూవీ గనుక సక్సెస్ అయితే, ఆమె మళ్ళీ సక్సెస్ ట్రాక్ ఎక్కడం ఖాయం. టాలీవుడ్, కోలీవుడ్ అనే తేడా లేకుండా ఈ ఏడాది సమ్మర్ సీజన్ పక్కా యాక్షన్ మోడ్‌లోకి వెళ్ళిపోయింది. ఇప్పటికే పెద్ద పెద్ద స్టార్ల సినిమాలు క్యూ కడుతుండగా, ఇప్పుడు ఆ రేసులోకి కోలీవుడ్ యంగ్ బ్యూటీ దుషారా విజయన్ తన పాన్ ఇండియా మూవీ ‘కట్టలాన్’ తో ఎంట్రీ ఇస్తోంది.