నేను ఓడిపోతే దేశమే ఓడిపోతుంది! ‘గవర్నర్’ పోస్టర్తో అదా శర్మ మైండ్ బ్లాక్ అప్డేట్!
ఈరోజు మనం ప్రపంచ శక్తిగా నిలిచామంటే, దానికి కారణం ఒక అజ్ఞాత వీరుడు సాగించిన అప్రకటిత యుద్ధమే అంటూ సినిమా నేపథ్యంపై హింట్ ఇచ్చింది
దిశ, సినిమా: యంగ్ బ్యూటీ అదా శర్మ, ‘ది కేరళ స్టోరీ’తో దేశవ్యాప్తంగా సెన్సేషన్ క్రియేట్ చేసిన సంగతి తెలిసిందే. వివాదాలు ఎదురైనా బాక్సాఫీస్ వద్ద రికార్డులు సృష్టించడంలో ఆమె ఎప్పుడూ ముందుంటుంది. తాజాగా అదా శర్మ తన కొత్త ప్రాజెక్ట్ ‘గవర్నర్: ది సైలెంట్ సేవియర్’ను అనౌన్స్ చేసి అందరినీ ఆశ్చర్యపరిచింది. ‘ది కేరళ స్టోరీ’ నిర్మాత విపుల్ అమృత్లాల్ షాతో కలిసి ఆమె చేస్తున్న మూడో సినిమా ఇది కావడం విశేషం. ఈ మూవీ గురించి సోషల్ మీడియాలో పోస్ట్ పెట్టిన అదా, చాలా ఆసక్తికరమైన విషయాలను పంచుకుంది. "ఈరోజు మనం ప్రపంచ శక్తిగా నిలిచామంటే, దానికి కారణం ఒక అజ్ఞాత వీరుడు సాగించిన అప్రకటిత యుద్ధమే" అంటూ సినిమా నేపథ్యంపై హింట్ ఇచ్చింది. అంటే దేశ రక్షణ కోసం తెరవెనుక ఉండి పోరాడే అధికారి కథగా ఇది ఉండబోతోందని అర్థమవుతోంది. ఈ సినిమాకు సంబంధించి విడుదలైన రెండు పోస్టర్లు ఎంతో ఇంటెన్సివ్గా ఉన్నాయి. అయితే ఎక్కడా నటీనటుల ముఖాలు చూపించకుండా కేవలం థీమ్ ద్వారానే కథా గంభీరతను చాటి చెప్పారు.
మొదటి పోస్టర్లో ప్రభుత్వ డెస్క్ వెనుక ఒక ఖాళీ కుర్చీ కనిపిస్తుంది. ఇది కేవలం ఒక పదవి మాత్రమే కాదని, దేశం మొత్తాన్ని ప్రభావితం చేసే అత్యంత భారమైన బాధ్యత అని సూచిస్తుంది. ఆ కుర్చీలో కూర్చున్న వ్యక్తి తీసుకునే నిర్ణయాలు ఎంత కీలకమో చెప్పకనే చెప్పారు. రెండో పోస్టర్లో ఒక వ్యక్తి చేతిలో బ్రీఫ్కేస్ పట్టుకుని చీకటి కారిడార్లో ఒంటరిగా నడుస్తూ కనిపిస్తాడు. దీనిపై ఉన్న “నేను విఫలమైతే... భారతదేశం విఫలమవుతుంది” అనే వాక్యం చూస్తుంటే, దేశ భవిష్యత్తు కోసం ఆ వ్యక్తి ఎంతటి ఒత్తిడిని అనుభవిస్తున్నాడో అర్థమవుతోంది. ఇది ఒక సాధారణ రాజకీయ డ్రామా మాత్రమే కాదు, ఒక గొప్ప మానవీయ కోణమున్న కథ అని స్పష్టమవుతోంది. చిన్మయ్ డి మండలేకర్ దర్శకత్వం వహిస్తున్న ఈ చిత్రానికి అమిత్ త్రివేది సంగీతం అందిస్తున్నారు. వెటరన్ లిరిసిస్ట్ జావేద్ అక్తర్ పాటలు రాస్తుండటం విశేషం. విపుల్ అమృత్లాల్ షా నిర్మిస్తున్న ఈ హై-వోల్టేజ్ డ్రామా జూన్ 12, 2026న థియేటర్లలో విడుదల కానుంది. ప్రస్తుతం అదా శర్మ ‘సూపర్ వెల్లి’, ‘హాటక్’ వంటి సినిమాలతో బిజీగా ఉండగా, ‘గవర్నర్’ ఆమె కెరీర్లో మరో మైలురాయిగా నిలుస్తుందని ఫ్యాన్స్ భావిస్తున్నారు.
