అలాంటి పాత్రలు చేసి నీ స్థాయి తగ్గించుకోవద్దు.. మృణాల్‌కు కీలక సూచన చేసిన నాగ్ అశ్విన్

దిశ, సినిమా: టాలీవుడ్‌లో ‘సీతారామం’ సినిమాతో సెన్సేషన్ క్రియేట్ చేసిన మృణాల్ ఠాకూర్ గురించి ప్రత్యేకంగా పరిచయం అక్కర్లేదు. తొలి మూవీతోనే ‘సీత’గా తెలుగు ప్రేక్షకుల మనసుల్లో చెరగని ముద్ర వేసుకున్న ఈ భామ, ప్రస్తుతం వరుస సినిమాలతో దూసుకుపోతోంది. తాజాగా, అడివి శేష్‌తో కలిసి నటించిన ‘డెకాయిట్’ చిత్రం మంచి విజయాన్ని అందుకోవడంతో, ఈ మూవీ సక్సెస్ మీట్‌ను చిత్రబృందం ఘనంగా నిర్వహించింది. ఈ వేడుకకు ముఖ్య అతిథిగా విచ్చేసిన స్టార్ డైరెక్టర్ నాగ్ అశ్విన్ మృణాల్ గురించి చేసిన వ్యాఖ్యలు ఇప్పుడు ఇండస్ట్రీలో హాట్ టాపిక్‌గా మారాయి. నాగ్ అశ్విన్ మాట్లాడుతూ.. మృణాల్ నటనపై ప్రశంసల వర్షం కురిపించారు. ఆమెను సాదాసీదా నటిగా కాకుండా, భారతీయ చిత్ర పరిశ్రమలోని లెజెండరీ నటీమణులతో పోల్చడం అందరినీ ఆశ్చర్యపరిచింది. "మృణాల్ ఒక అద్భుతమైన నటి. ఆమెలో ఒక ప్రత్యేకమైన గ్రేస్ ఉంది. గతంలో మనల్ని అలరించిన స్మిత పాటిల్, మధుబాల వంటి లెజెండరీ హీరోయిన్ల తరహాలో మృణాల్ కనిపిస్తుంది.

అలాంటి గొప్ప నటీమణులు చాలా అరుదుగా ఉంటారు" అని నాగ్ అశ్విన్ కొనియాడారు. కేవలం పొగడ్తలతోనే సరిపెట్టకుండా, మృణాల్‌కు ఒక విలువైన సూచన కూడా ఇచ్చారు నాగ్ అశ్విన్. "నువ్వు చాలా గొప్ప స్థాయి ఉన్న నటివి. కాబట్టి చిన్న చిన్న పాత్రలు లేదా ప్రాధాన్యత లేని సాధారణమైన క్యారెక్టర్లు చేసి నీ స్థాయిని తగ్గించుకోవద్దు. ఎప్పటికీ గుర్తుండిపోయే గొప్ప పాత్రలనే ఎంచుకోవాలని నేను కోరుకుంటున్నాను" అని ఆయన ఆసక్తికర వ్యాఖ్యలు చేశారు. ఒక స్టార్ డైరెక్టర్ ఇలా బహిరంగంగా ఒక హీరోయిన్ కెరీర్ పట్ల శ్రద్ధ చూపడం నెట్టింట వైరల్ అవుతోంది. నాగ్ అశ్విన్ చేసిన ఈ కామెంట్స్‌కు సంబంధించిన వీడియోలు సోషల్ మీడియాలో విపరీతంగా షేర్ అవుతున్నాయి. మృణాల్ అభిమానులు ఆయన మాటలతో ఏకీభవిస్తూ, ఆమె నిజంగానే ఈ తరం మధుబాల అని కామెంట్స్ చేస్తున్నారు. ‘సీతారామం’ తర్వాత మృణాల్ తన పాత్రల ఎంపికలో ఎంతో జాగ్రత్త వహిస్తోంది. ఇప్పుడు నాగ్ అశ్విన్ ఇచ్చిన సలహాతో ఆమె భవిష్యత్తులో మరిన్ని లెజెండరీ పాత్రలు చేసే అవకాశం ఉందని సినీ విశ్లేషకులు భావిస్తున్నారు. ప్రస్తుతం ‘డెకాయిట్’ సక్సెస్‌ను ఎంజాయ్ చేస్తున్న మృణాల్, నాగ్ అశ్విన్ ప్రశంసలకు ఎంతో సంతోషం వ్యక్తం చేశారు.