బాలయ్య బ్యూటీకి చేదు అనుభవం.. హద్దు దాటిన ఆకతాయిల ప్రవర్తన..
ఒక మాల్ ప్రారంభోత్సవానికి వెళ్లిన ఆమెను చూసేందుకు అభిమానులు ఎగబడ్డారు. తన అభిమాన నటిని దగ్గరగా చూసేందుకు, ఆమెతో సెల్ఫీలు దిగేందుకు జనం పెద్ద ఎత్తున పోటీ పడ్డారు. హనీ రోజ్ కూడా ఎంతో ఓపికగా అందరికీ సెల్ఫీలు ఇస్తూ సందడి చేశారు.
దిశ, సినిమా: టాలీవుడ్ సెన్సేషన్, మలయాళ ముద్దుగుమ్మ హనీ రోజ్ గురించి ఇప్పుడు ప్రత్యేకంగా చెప్పాల్సిన అవసరం లేదు. బాలకృష్ణ సరసన 'వీరసింహారెడ్డి' సినిమాలో నటించి తెలుగు ప్రేక్షకుల గుండెల్లో చెరగని ముద్ర వేసుకున్న ఈ భామ, ఓవర్నైట్ స్టార్గా మారిపోయింది. తనదైన అందం, అభినయంతో సోషల్ మీడియాలో కూడా భారీ ఫాలోయింగ్ను సంపాదించుకుంది. తాజాగా, ఓ షాపింగ్ మాల్ ఓపెనింగ్కు వెళ్లిన ఈ నటికి ఒక ఊహించని చేదు అనుభవం ఎదురైంది. వివరాల్లోకి వెళ్తే.. కేవలం సినిమాలు మాత్రమే కాకుండా, పలు బ్రాండ్ ఎండార్స్మెంట్స్, షాపింగ్ మాల్స్ ప్రారంభోత్సవాల్లో హనీ రోజ్ ఎప్పుడూ బిజీగా ఉంటుంది. ఈ క్రమంలోనే ఒక మాల్ ప్రారంభోత్సవానికి వెళ్లిన ఆమెను చూసేందుకు అభిమానులు ఎగబడ్డారు. తన అభిమాన నటిని దగ్గరగా చూసేందుకు, ఆమెతో సెల్ఫీలు దిగేందుకు జనం పెద్ద ఎత్తున పోటీ పడ్డారు. హనీ రోజ్ కూడా ఎంతో ఓపికగా అందరికీ సెల్ఫీలు ఇస్తూ సందడి చేశారు. కానీ, అదే సమయంలో కొందరు ఆకతాయిలు అతిగా ప్రవర్తించారు.
సెల్ఫీలు దిగుతున్న నెపంతో హనీ రోజ్ నడుము, వెనుక భాగంపై చేతులు వేసి అసభ్యంగా ప్రవర్తించారు. జనం ఎక్కువగా ఉండటంతో మొదట ఇబ్బంది పడిన ఆమె, పరిస్థితి చేయి దాటుతోందని గ్రహించి వెంటనే అక్కడి నుంచి వెళ్ళిపోయారు. ఆ సమయంలో ఆమె చేతిలో ఫోన్ ఉండటం, చుట్టూ జనం చుట్టుముట్టడంతో ఆమె కొంత అసౌకర్యానికి గురైనట్లు స్పష్టంగా కనిపిస్తోంది. ప్రస్తుతం ఈ ఘటనకు సంబంధించిన వీడియోలు సోషల్ మీడియాలో తెగ వైరల్ అవుతున్నాయి. ఇది చూసిన నెటిజన్లు తీవ్రంగా మండిపడుతున్నారు. "అభిమానం ఉండాలి కానీ ఇలా అసభ్యంగా ప్రవర్తించడం ఏంటి?" అని కొందరు ప్రశ్నిస్తుంటే, "సెలబ్రిటీల భద్రత విషయంలో నిర్వాహకులు జాగ్రత్తలు తీసుకోవాలి" అని మరికొందరు కామెంట్స్ చేస్తున్నారు. ఒక ఫేమస్ నటికి ఇలాంటి చేదు అనుభవం ఎదురవ్వడం పట్ల సినీ వర్గాలు కూడా విచారం వ్యక్తం చేస్తున్నాయి.
