ఉడుత బొమ్మతో విజయ్ను విమర్శించిన నటి.. పోలీసుల ఎంట్రీతో ఊహించని ట్విస్ట్!
విజయ్ని ఉడుత బొమ్మతో పోల్చుతూ దానిపై ఎక్స్ గుర్తు వేసి ఉన్న పోస్టర్ను ప్రదర్శించారు. విజయ్ రాజకీయ పార్టీ ద్వారా మహిళలకు రక్షణ ఉండదని ఆమె నినాదాలు చేయడం విజయ్ అభిమానులను తీవ్ర ఆగ్రహానికి గురిచేసింది.
దిశ, సినిమా: తమిళనాడు రాజకీయాల్లో ఇప్పుడు నటి జూలీ పేరు హాట్ టాపిక్గా మారింది. జల్లికట్టు ఉద్యమం ద్వారా వెలుగులోకి వచ్చిన ఆమె, ఇప్పుడు తమిళగ వెట్రికళగం (TVK) అధ్యక్షుడు, నటుడు విజయ్ టార్గెట్ చేసి.. చేస్తున్న విమర్శలు సోషల్ మీడియాలో సెన్సేషన్ సృష్టిస్తున్నాయి. మెరీనా బీచ్ వేదికగా ఆమె చేపట్టిన ఆకస్మిక నిరసన ఇప్పుడు తీవ్ర చర్చకు దారితీసింది. చెన్నై మెరీనా బీచ్లోని ఔవయ్యార్ విగ్రహం వద్ద జూలీ తన మద్దతుదారులతో కలిసి ముందస్తు అనుమతి లేకుండా నిరసన ప్రదర్శన నిర్వహించారు. ఈ సందర్భంగా.. ఆమె పట్టుకున్న ప్లకార్డులు అందరినీ ఆశ్చర్యపరిచాయి. ఒక చేతిలో "DMKకే ఓటు వేయండి" అనే బ్యానర్ను పట్టుకున్న ఆమె, మరో చేతిలో విజయ్ని ఉడుత బొమ్మతో పోల్చుతూ దానిపై ఎక్స్ గుర్తు వేసి ఉన్న పోస్టర్ను ప్రదర్శించారు. విజయ్ రాజకీయ పార్టీ ద్వారా మహిళలకు రక్షణ ఉండదని ఆమె నినాదాలు చేయడం విజయ్ అభిమానులను తీవ్ర ఆగ్రహానికి గురిచేసింది.
బహిరంగ ప్రదేశంలో, అది కూడా నిరసనలకు అనుమతి లేని మెరీనా బీచ్లో ఆకస్మికంగా ఆందోళన చేపట్టడంతో పోలీసులు రంగప్రవేశం చేశారు. శాంతిభద్రతలకు విఘాతం కలగకుండా జూలీతో పాటు ఆమె వెంట ఉన్న నలుగురు మద్దతుదారులను పోలీసులు అదుపులోకి తీసుకున్నారు. వారిని స్థానిక పోలీస్ స్టేషన్కు తరలించి విచారించారు. తాజా సమాచారం ప్రకారం.. అనుమతి లేకుండా నిరసన తెలిపినందుకు గానూ ఆమెతో క్షమాపణ లేఖ రాయించుకుని పోలీసులు విడుదల చేసినట్లు తెలుస్తోంది. ఇప్పటికే పెరంబూర్ నియోజకవర్గంలో విజయ్కి వ్యతిరేకంగా ప్రచారం చేసిన జూలీ, ఇప్పుడు ఏకంగా డీఎంకేకు మద్దతుగా బ్యానర్లు పట్టుకోవడం వెనుక రాజకీయ ప్రయోజనాలు ఉన్నాయనే ఆరోపణలు వస్తున్నాయి. విజయ్ అభిమానులు సోషల్ మీడియా వేదికగా జూలీపై విమర్శల వర్షం కురిపిస్తున్నారు. రాజకీయాల్లోకి వస్తున్న విజయ్ను అప్రతిష్ఠ పాలు చేయడానికే ఆమె ఇలాంటి పనులు చేస్తోందని వారు మండిపడుతున్నారు.
