అంచనాలను అందుకోలేని అక్టోబర్.. ఆర్థిక మంత్రిత్వ శాఖ

దిశ, వెబ్‌డెస్క్: 2021-22 ఆర్థిక సంవత్సరం రెండవ త్రైమాసికంలో భారత్ ప్రీ-పాండమిక్ అవుట్‌పుట్ స్థాయిని పూర్తిగా పునరుద్ధరించిందని ఆర్థిక మంత్రిత్వ శాఖ పేర్కొంది. లాక్‌డౌన్ తర్వాత ఆర్థిక కార్యకలాపాలు పుంజుకున్నాయి. సేవలలో పునరుద్ధరణ, తయారీ రంగంలో రికవరీ, వ్యవసాయ రంగంలో స్థిరమైన వృద్ధిని నమోదు చేసింది. పండుగ సమయంలో అధిక వృద్ధిని అంచనా వేసినప్పటికీ పారిశ్రామిక వృద్ధి 3.2% వద్ద స్వల్పంగా ఉంది. పునరుద్ధరణకు మద్దతుగా ప్రభుత్వం మరిన్ని చర్యలు తీసుకోవాలని ఆర్థికవేత్తలు పిలుపునిచ్చారు. ఇన్‌ఫ్రాస్ట్రక్చర్ రంగం గత ఏడాది ఇదే నెలలో ఉత్పత్తిలో 10.9% పెరుగుదలతో 5.3% వృద్ధిని సాధించింది. పారిశ్రామిక ఉత్పత్తి సూచి (IIP) అక్టోబర్ 2019 ప్రీ-పాండమిక్ స్థాయి కంటే 7.8% ఎక్కువగా ఉంది. సెప్టెంబర్‌తో పోలిస్తే అక్టోబర్‌లో ఇండెక్స్ 4.3% పెరిగింది.

కన్స్యూమర్ డ్యూరబుల్స్ ఉత్పత్తి 6.1% కుదించగా, నాన్-డ్యూరబుల్స్ అవుట్‌పుట్ 0.5% పెరిగింది. పెట్టుబడి కార్యకలాపాల సూచిక అయిన మూలధన వస్తువుల ఉత్పత్తి 1.1% కుదించబడింది. తయారీ ఉత్పత్తి 2%, మైనింగ్ 11.4%, విద్యుత్ 3.1% పెరిగింది. అక్టోబర్‌లో మోటారు వాహనాల ఉత్పత్తి 12.6% క్షీణించింది. ఏప్రిల్-అక్టోబర్ కాలంలో పారిశ్రామిక ఉత్పత్తి గత ఏడాది ఇదే కాలంలో 17.3% సంకోచంతో పోలిస్తే 20% పెరిగింది. ఆటోమెుబైల్ పరిశ్రమలో చిప్‌ల కొరత, విద్యుత్ డిమాండ్, GST ఇ-వే బిల్లులు, పోర్ట్ కార్గో ట్రాఫిక్ మొదలైన వాటితో సహా అనేక ఇతర హై-ఫ్రీక్వెన్సీ సూచికల పనితీరు నవంబర్ 2021లో క్షీణించిందని ఆర్థిక మంత్రిత్వ శాఖ తెలిపింది.