నిలబడతాం!

స్వతంత్రమై ఎగిరే పతంగిలా

స్వేచ్ఛపై పూర్తి హక్కుతో,

నిట్టూర్పులోని నిజంలా నిలబడతాం !

పిడికిలి మా ధైర్యం

సాహసం మా ఊపిరి

ప్రతిచోట, ప్రతి కదలికలో

ఆత్మస్థైర్యంతోనే అధికారం చెలాయిస్తాం !

మాకు వెలకడితే పిడుగులవుతాం !

ఆ శిఖరం మా ఎత్తు

ఆ హిమం మా మనస్సు

ఆ జ్వాల మా ఆగ్రహం !

ఆనాటి పరదా చాటు బొమ్మలం కాదు.

పంచేంద్రియాలు నిగ్రహంతో నింపుకొని,

సృష్టికే మూల బిందువులం.

అంతటా నిలబడే వనితలం.

నిలబడతాం...

అణచివేత సమాజాన్ని

చూస్తూ కాదు,

మా దారులకు అడ్డుగా ఉన్న చీడల్ని,

వెతికి పహారా కాచే సైనికుల్లా !

నిలబడతాం...

ప్రపంచ మనుగడలను

లెక్కిస్తూ చూస్తున్నాం.

కన్నీటి ఛాయల్ని మూసుకుంటూ కాదు, తెరచుకుంటూ !

నిలబడతాం...

తాదాత్మ్య భావాన్ని పంచుకుంటూ,

ప్రగతి పథానికి ఆరనిజ్యోతిలా !

నిలబడతాం....

ఒక్కో నిశ్శబ్దం అనంతశబ్దాల ధ్వనిలా,

వెలిగే నిత్య జీవన వెలుగులా !

-అనిత చరణ్

94945 79069