Viral News: నిజమైన నాగు పాములతో నాగిని డ్యాన్స్.. తాగిన మత్తులో రచ్చ రచ్చ జేసిండ్రు పో..

దిశ, ఫీచర్స్ : పెళ్లిలో బరాత్ కామన్.. ఫుల్లుగా మందేసి నాగిని డ్యాన్స్ చేయడం కూడా కామనే. కానీ ఒడిశాలోని భద్రక్ జిల్లాలో అనూహ్య సంఘటన చోటు చేసుకుంది. బన్సాడా పంచాయితీలోని చెడక్ గ్రామంలో జరిగిన ఓ పెళ్లి ఊరేగింపులో ఇద్దరు పాములు పట్టుకునే వ్యక్తులు, ఓ ట్రాన్స్‌జెండర్ నిజమైన నాగుపాములతో నాగిని డ్యాన్స్ చేశారు. అయితే స్థానికులు కూడా ఈ డ్యాన్స్‌ను ఎంజాయ్ చేస్తూ ఫోన్‌లో వీడియో తీసుకోవడం మరింత షాక్‌ను ఇస్తోంది. ఇందుకు సంబంధించిన వీడియో ప్రస్తుతం సోషల్ మీడియాలో చక్కర్లు కొడుతోంది. ఈ ఘటన ధమరా పీఎస్ పరిధిలోని చందబలి రోడ్డులో చోటు చేసుకుంది.

అయితే ఇలా పాములను హింసించడం 1972 వన్యప్రాణి సంరక్షణ చట్టం ప్రకారం నేరం. కాగా ఈ ఘటన ఆచారాలు, చట్టాల మధ్య సంఘర్షణను హైలైట్ చేస్తుంది. ఇక సమాచారం అందిన వెంటనే భద్రక్ వన్యప్రాణి విభాగం ఊరేగింపును అడ్డుకుని.. మూడు నాగు పాములను రక్షించింది. భద్రక్ డివిజనల్ ఫారెస్ట్ ఆఫీసర్ (వైల్డ్‌లైఫ్) సౌభాగ్య కుమార్ సాహు.. ఈ ఘటనలో పాల్గొన్న స్నేక్ చార్మర్ గుర్తింపు కోసం స్పెషల్ టాస్క్ ఫోర్స్ (STF) సహాయంతో విచారణ జరుపుతున్నట్లు తెలిపారు. కాగా ఈ డాన్సర్లు భువనేశ్వర్ నుంచి నియమించబడ్డారని.. అధికారులు రాకముందే సంఘటనా స్థలం నుంచి పరారయ్యారని చెప్పారు.