Technology : మెదడు పనితీరును అనుకరించే టెక్నాలజీ.. కృత్రిమ నరాలను క్రియేట్ చేసిన శాస్త్రవేత్తలు!

దిశ, ఫీచర్స్ : మానవ శరీర నిర్మాణంలోని ముఖ్యమైన భాగాల్లో నరాలు లేదా నాడీ వ్యవస్థ ఒకటి. అయితే ఇది ఎలా పనిచేస్తుంది? న్యూరాన్ల ఎలక్ట్రిక్ బిహేవియర్ ఎలా ఉంటుంది? ఇలాంటి సందేహాలు నివృత్తి చేసుకునే క్రమంలో శాస్త్రవేత్తలు అనేక ప్రయోగాలు చేస్తుంటారు. అయితే తాజాగా జీవంతో ఉన్న మెదడు కణాలతో కమ్యూనికేట్ చేయగల సరికొత్త పరికరాన్ని యూనివర్సిటీ ఆఫ్ మసాచుసెట్స్ అమ్హెర్ట్స్(UMass Amherst)కు చెందిన పరిశోధకులు క్రియేట్ చేశారు. దీనిని ప్రొటీన్ నానోవైర్ ఆధారిత మెమ్రిస్టర్ (memristor) లేదా బయో ఎలక్ట్రానిక్ న్యూరాన్ మిమిక్ ’ అని పిలుస్తున్నారు.

శాస్త్రవేత్తలు క్రియేట్ చేసిన ఆర్టిఫిషియల్ న్యూరాన్, సహజమైన న్యూరల్ సిగ్నల్స్‌కు సరిపడే తక్కువస్థాయి శక్తిని కలిగి ఉంటుంది. కాబట్టి ఇది ఎలక్ట్రానిక్స్‌ను జీవశాస్త్రంతో ఇంటిగ్రేట్ చేయడంలో ఒక ముఖ్యమైన ముందడుగు అంటున్నారు శాస్త్రవేత్తలు. జీవసంబంధమైన న్యూరాన్ల ప్రవర్తనను అనుకరించడంలోనూ ఇది ఎఫెక్టివ్‌గా పనిచేయగలదు. అయితే కేవలం 0.1 వోల్ట్‌ల వద్ద మాత్రమే పనిచేస్తుందని పరిశోధకులు అంటున్నారు. ఇందులోని ప్రొటీన్ నానోవైర్లు బ్యాక్టీరియా నుండి తీసుకోబడ్డాయి. అంతేకాకుండా ఇవి సహజంగా ఉత్పత్తి అయ్యే పదార్థాలు కావడంతో ఈ టెక్నాలజీ బయోకంపాటిబుల్‌గా ఉంటుంది. పైగా పరికరం న్యూరాన్ల మధ్య సిగ్నల్ ట్రాన్స్‌మిషన్‌ను అనుకరిస్తూ, ఎక్సైటేటరీ, అలాగే ఇన్‌హిబిటరీ సిగ్నల్స్‌ను ఉత్పత్తి చేయగలదు. ఇక దాని ఉపయోగాల విషయానికి వస్తే ఇది బ్రెయిన్ ఫంక్షన్‌ను మరింత డీప్‌గా అర్థం చేసుకోవడానికి సహాయపడుతుంది. అంతేకాకుండా ఇది ఎలక్ట్రానిక్స్, ప్రోస్థెటిక్స్, అలాగే బ్రెయిన్-మెషిన్ ఇంటర్‌ఫేస్‌లకు కొత్త మార్గాలు తెరుస్తుందని, భవిష్యత్తులో ఇలాంటి పరికరాలు న్యూరల్ డిసీజెస్ చికిత్సలో ఉపయోగపడతాయని నిపుణులు అంటున్నారు.