షాకింగ్.. స్పెర్మ్‌తో ఫేషియల్ చేసుకుంటారా? అసలు ఏం జరుగుతుంది?

దిశ, ఫీచర్స్ : చర్మ సంరక్షణలో సరికొత్త టెక్నిక్ ట్రెండ్ అవుతోంది. సాల్మన్ స్పెర్మ్ ఫేషియల్ లేదా పాలిన్యూక్లియోటైడ్ ఇంజెక్షన్స్ అని పిలువబడే వినూత్న చికిత్స అందుబాటులోకి వచ్చింది. ఈ ట్రీట్మెంట్‌లో సాల్మన్ డీఎన్ఏ నుంచి తీసిన సాంద్రీకృత రూపాన్ని చర్మంలోకి ఇంజెక్ట్ చేస్తారు. ఈ ప్రక్రియ చర్మాన్ని పునరుజ్జీవనం చేయడం.. కొలాజన్ ఉత్పత్తిని ప్రోత్సహించడం.. చర్మ హైడ్రేషన్‌ను మెరుగుపరచడం.. వృద్ధాప్య సంకేతాలను తగ్గిస్తుంది. కాగా ఈ చికిత్స గురించి పూర్తి వివరాలను తెలుసుకుందాం.

సాల్మన్ స్పెర్మ్ ఫేషియల్ అంటే ఏమిటి?

సాల్మన్ స్పెర్మ్ ఫేషియల్ అనే పేరు కొంత విచిత్రంగా అనిపించినప్పటికీ.. ఇది నేరుగా సాల్మన్ స్పెర్మ్‌ను చర్మంపై రాసే చికిత్స కాదు. సాల్మన్ స్పెర్మ్ నుంచి సేకరించిన పాలిన్యూక్లియోటైడ్స్ (డీఎన్ఏ‌లోని చిన్న భాగాలు)ను శుద్ధి చేసి.. స్టెరిలైజ్ చేసి.. చర్మంలోకి ఇంజెక్ట్ చేస్తారు. లేదంటే మైక్రోనీడ్లింగ్ వంటి పద్ధతుల ద్వారా చర్మంలోకి చొప్పించబడతాయి. ఈ పాలిన్యూక్లియోటైడ్స్ మానవ డీఎన్ఏతో సమానమైన నిర్మాణాన్ని కలిగి ఉంటాయి. ఇది చర్మ కణాల పునరుత్పత్తి, మరమ్మత్తుకు సహాయపడుతుంది.

యూరప్, దక్షిణ కొరియా, ఆసియా దేశాలలో ఎక్కువగా వినియోగించబడుతున్న ఈ చికిత్సను ‘రెజురాన్’, ‘న్యూక్లియోఫిల్’, ‘అమీలా’, ‘విటారాన్’ వంటి బ్రాండ్ పేర్లతో పిలుస్తారు. దక్షిణ కొరియాలో దాదాపు దశాబ్ద కాలంగా ప్రజాదరణ పొందిన ట్రీట్మెంట్.. ఇటీవల పాశ్చాత్య దేశాలలో ముఖ్యంగా సెలెబ్రిటీలైన కిమ్ కర్దాషియన్, జెన్నిఫర్ అనిస్టన్, హేలీ బీబర్ వంటి వారిచే ప్రచారం పొందింది.

ఎలా పనిచేస్తుంది?

పాలిన్యూక్లియోటైడ్స్ అనేవి డీఎన్ఏ, ఆర్ఎన్ఏ యొక్క బిల్డింగ్ బ్లాక్స్ అయిన న్యూక్లియోటైడ్స్‌కు చెందిన పొడవైన గొలుసులు. సాల్మన్ స్పెర్మ్ నుంచి తీసిన ఈ పాలిన్యూక్లియోటైడ్స్ శుద్ధి చేయబడి, మానవ చర్మంతో అనుకూలంగా ఉండేలా తయారు చేయబడతాయి. ఈ ఇంజెక్షన్లు చర్మంలోని డెర్మిస్ (చర్మం మధ్య లేయర్)లోకి ఇంజెక్ట్ చేయబడతాయి.

ఫైబ్రోబ్లాస్ట్‌లను ఉత్తేజపరచడం: ఫైబ్రోబ్లాస్ట్‌లు చర్మంలో కొలాజన్, ఎలాస్టిన్‌ను ఉత్పత్తి చేసే కణాలు. వయసు పెరిగే కొద్దీ ఈ కణాల కార్యకలాపం తగ్గుతుంది. కానీ పాలిన్యూక్లియోటైడ్స్ వాటిని ఉత్తేజపరిచి కొలాజన్, ఎలాస్టిన్ ఉత్పత్తిని పెంచుతాయి. ఇది చర్మ స్థితిస్థాపకత, దృఢత్వాన్ని మెరుగుపరుస్తుంది.

హైడ్రేషన్ పెంచడం: పాలిన్యూక్లియోటైడ్స్ నీటిని ఆకర్షించి, చర్మంలో తేమను నిలుపుకునే సామర్థ్యం కలిగి ఉంటాయి. ఇది చర్మాన్ని హైడ్రేటెడ్‌గా, ప్లంప్‌గా ఉంచుతుంది. ముఖ్యంగా కళ్ల కింది ప్రాంతం వంటి పొడి చర్మం ఉన్న ప్రదేశాలకు ఉపయోగకరం.

కణాల మరమ్మత్తు: పాలిన్యూక్లియోటైడ్స్ కణాల విభజన, మైగ్రేషన్‌ను వేగవంతం చేస్తాయి. దెబ్బతిన్న చర్మ కణాలను మరమ్మత్తు చేయడంలో సహాయపడతాయి. ఇది మచ్చలు, రోసాసియా, సన్ డ్యామేజ్ వంటి సమస్యలకు ఉపయోగకరం.

యాంటీ-ఇన్‌ఫ్లమేటరీ ఎఫెక్ట్స్: ఈ ఇంజెక్షన్లు యాంటీ-ఇన్‌ఫ్లమేటరీ లక్షణాలను కలిగి ఉంటాయి. ఇవి చర్మంలో కలిగే వాపును తగ్గించి, చర్మాన్ని రిలాక్స్‌గా ఉంచుతాయి.

యాంటీ-ఆక్సిడెంట్ గుణాలు: పాలిన్యూక్లియోటైడ్స్ ఫ్రీ రాడికల్స్‌ను నిరోధించడం ద్వారా పర్యావరణ కాలుష్యం, ఆక్సిడేటివ్ స్ట్రెస్ నుంచి చర్మాన్ని రక్షిస్తాయి.

కాబట్టి వృద్ధాప్య సంకేతాలను తగ్గించాలనుకునే వారు, పొడి చర్మం, మచ్చలు ఉన్నవారు ప్రివెంటివ్ ట్రీట్మెంట్‌గా ఉపయోగించవచ్చు.