హోమ్ రోబోటిక్స్లో కొత్త శకం.. చిన్న చిన్న వాటితోనే పెద్ద మార్పు!
ఆన్బోర్డ్ కంట్రోల్ సిస్టమ్లతో తయారవుతున్న రోబోలు వస్తువులను కదల్చడం, పట్టుకోవడం, సర్దడం, మార్చడం వంటి ప్రాథమిక ఇంటి పనులు చేయగలుగుతున్నాయి.
దిశ, ఫీచర్స్ : ఏఐ, రోబోటిక్ టెక్నాలజీ వేగంగా అభివృద్ధి చెందుతున్న నేపథ్యంలో, ఇప్పుడు హోమ్ రోబోటిక్స్ కొత్త దశలోకి అడుగుపెడుతోంది. ఖరీదైన, సంక్లిష్టమైన హ్యూమనాయిడ్ రోబోలకు బదులు, చిన్న చిన్న, చౌకైన ప్రోటోటైప్ రోబోలను అభివృద్ధి చేయడంపై సాంకేతిక నిపుణులు దృష్టి సారిస్తున్నారు. అయితే వీటివల్ల ఉపయోగాలు ఏమిటో ఇప్పుడు తెలుసుకుందాం.
ఎలా ఉంటాయి ఈ రోబోలు?
హోమ్ రోబోటిక్స్ ట్రాక్డ్ బేస్ (tracks like a caterpillar), ఎక్స్పోజ్డ్ వైరింగ్, కస్టమ్ ఫ్రేమ్లు, చిన్న యాక్చుయేటర్లు, అలాగే ఆన్బోర్డ్ కంట్రోల్ సిస్టమ్లతో తయారవుతున్నాయి. సాధారణ గదుల్లో వస్తువులను కదల్చడం, పట్టుకోవడం, సర్దడం, మార్చడం వంటి ప్రాథమిక ఇంటి పనులు చేయగలుగుతున్నాయి. ఇవి ఇంకా అస్తవ్యస్తమైన (messy) ప్రోటోటైప్లే అయినప్పటికీ, బేసిక్ మూవ్మెంట్, గ్రిప్, బ్యాలెన్స్, నావిగేషన్ నైపుణ్యాలను నేర్చుకుంటున్నాయి. చైనాలోని DIY రోబోటిక్స్ ఉత్సాహవంతులు ఇలాంటి రోబోలను తయారు చేస్తున్నట్లు నివేదికలు పేర్కొంటున్నాయి.
ప్రయోజనాలు ఏమిటి?
నిపుణుల అభిప్రాయం ప్రకారం.. పర్ఫెక్ట్ హోమ్ రోబోలు ఒక్కసారిగా అందరికీ అందుబాటులోకి రావు. ముందు ఇలాంటి చిన్న, చౌకైన ప్రోటోటైప్ల ద్వారానే నిజ జీవిత పరిస్థితుల్లో (సాధారణ ఇళ్లు, ఫర్నిచర్, అడ్డంకులు) పరీక్షించి, లోపాలను సరిదిద్దుకోవాలి. ఈ దశ ఫిజికల్ ఏఐని ఇళ్లలోకి తీసుకురావడానికి ముఖ్యమైన పునాది వేస్తుంది. భవిష్యత్తులో ఇవి వృద్ధుల సంరక్షణ, ఇంటి పనులు, పిల్లల సహాయం వంటి అనేక రంగాల్లో సహాయపడే అవకాశం ఉంది.
