సమ్మగా ఉందని ఎనర్జీ డ్రింక్స్ ఇస్తున్నారా.?

ఎనర్జీ డ్రింక్స్ అంటే పిల్లలు లొట్టలేసుకొని తాగుతారు.

పేరెంట్స్ కూడా బలం వస్తుందేమో.. శక్తినిస్తాయేమో అని వద్దని చెప్పరు.

కానీ ఎనర్జీ డ్రింక్స్ ఎంత డేంజరో తాజా పరిశీలనలు చెప్తున్నాయి.

- దిశ, ఫీచర్స్

బానిస అవుతున్నారు: ఎనర్జీ డ్రింక్స్‌లో కెఫిన్.. టౌరిన్ అధికంగా ఉంటాయి. వీటిని పిల్లలు తాగడం వల్ల ఆరోగ్యానికి హాని కలిగిస్తాయి. వాటిలో ఉండే కెఫిన్ వల్ల పిల్లలు ఈ డ్రింక్స్‌కు బానిసవుతున్నారు.

మూడు రెట్ల అధికం: ఎనర్జీ డ్రింక్స్‌లో కెఫిన్ స్థాయిలు సాధారణ ఎరేటెడ్ కోలాస్ కన్నా దాదాపు 3 రెట్లు ఎక్కువగా ఉంటాయి. పరిమితి కన్నా మించిపోయి ఉన్నాయి. కాబట్టి అవి పిల్లలకు హాని చేస్తాయి.

వారికి అమ్మొద్దు: కొన్ని దేశాలలో ఈ ఎనర్జీ డ్రింక్స్ 15 ఏళ్ల కన్నా తక్కువ వయసున్న పిల్లలకు అమ్మరాదనే నిబంధన ఉంది. వాటిలో ఉండే కెఫిన్.. టౌరిన్ శాతమే దీనికి కారణం. అదే పిల్లల జీవితాలను నాశనం చేస్తుంది.

వ్యసనం: స్ట్రాబెర్రీ క్యాండీల మాదిరి స్ట్రాబెర్రీ క్విక్ డ్రింక్స్ వస్తు్న్నాయి. ఇలాంటివి తాగితే పాఠశాల స్థాయిలోనే మాదకద్రవ్యాల వ్యసనం ప్రారంభం అవుతుంది.

గుండె సమస్యలు: మార్కెట్లో లభ్యమయ్యే ఎనర్జీ డ్రింక్స్‌లో కెఫిన్ అధిక పరిమాణంలో ఉంటుంది. ఇది పిల్లల హార్ట్ రేట్ పెరుగుదల.. ఆందోళన.. గ్యా్స్ట్రిక్ సమస్యలు.. గుండె ఆరోగ్యం క్షీణించడం వంటి సమస్యలకు దారితీస్తాయి.

హెచ్చరిక: తీవ్రమైన సమస్యలకు కారణమవుతున్నాయి కాబట్టే ఎనర్జీ డ్రింక్స్‌ను 18 ఏళ్ల కన్నా తక్కువ వయసున్న వారు వీటిని తీసుకోరాదని ప్రపంచ ఆరోగ్య సంస్థ హెచ్చరించిందంటే వాటివల్ల కలిగే సమస్యలు ఎలాంటివో అర్థం చేసుకోవచ్చు.

మరేం తీసుకోవాలి: ఎనర్జీ డ్రింక్స్‌కు బదులు లస్సీ.. నిమ్మరసం.. పళ్ల రసాలు.. మిల్లెట్ ఆధారిత ఉత్పత్తులు వంటి హెల్దీ ఫుడ్ ఇవ్వాలని నిపుణులు సూచిస్తున్నారు. బజ్రా.. కాంగ్ని.. కోద్రా.. జోవర్.. సాన్వాన్.. రాగి వంటి మిల్లెట్స్‌ను నిర్లక్ష్యం చేయొద్దు.

నీరు ఆదా: శారీరక.. మానసిక ఆరోగ్యానికి మిల్లె్ట్స్ వంటి హెల్దీ ఫుడ్ చాలా అవసరం. వీటిని పండించడం వల్ల నీరు ఆదా అవుతుంది. ఇంకా ఆరోగ్యకరమైన ఆహారం పిల్లలకు ఇచ్చిన వాళ్లం అవుతాం.

అవగాహన: ఎనర్జీ డ్రింక్స్ జోలికి వెళ్లకుండా పోషకాలు పుష్కలంగా ఉండే ధాన్యాల ప్రయోజనాలపై అవగాహన కల్పించాలి. మాదకద్రవ్య వ్యసనానికి సంబంధించిన సమస్యలను ప్రాథమిక స్థాయి నుంచే పరిష్కరించాలి.