నెల రోజులు ఒక్కటే పండు తింటే ఏమవుతుంది?

దిశ, ఫీచర్స్ : కాలం మారుతుండొచ్చు.. కానీ కొన్ని స్థిరంగా ఉంటాయి.. వాటిలో ఒకటి బరువు మెయింటెన్ చేయడం. దాదాపు ప్రతి తరంలో దీని విషయంలో జనం ఇబ్బంది పడ్డారు. ప్రస్తుతం కూడా అలాంటి పరిస్థితి కొనసాగుతుంది. ఈ క్రమంలోనే ప్రస్తుతం మోనో డైట్ లేదా మోనోట్రోఫిక్ డైట్ ట్రెండ్ అవుతుంది. సెలబ్రిటీలు కూడా ఈ పద్ధతిని ఫాలో అవుతుండగా... అసలు ఈ వైరల్ డైట్ ఏంటి? ఈజీగా ఫాలో కావొచ్చా? తెలుసుకుందాం.

మోనో డైట్ అనేది ఒక డైట్ ప్లాన్. ఇందులో రోజుకు ఒక ఆహార పదార్థం మాత్రమే తీసుకోవడం జరుగుతుంది. దాని సరళత, స్వల్పకాలిక బరువు తగ్గే అవకాశమే కారణం. మోనోట్రోఫిక్ డైట్స్‌లో ఉపయోగించే కొన్ని సాధారణ ఆహారాలలో వివిధ పండ్లు, గుడ్లు, బంగాళాదుంపలు, ద్రాక్షపండు, క్యాబేజీ, పాలు, అరటిపండ్లు, బ్రౌన్ రైస్, చికెన్ బ్రెస్ట్, గింజలు కూడా ఉన్నాయి. క్లుప్తంగా ఏదైనా ఆహారం మోనోట్రోపిక్ డైట్ సెంటర్‌గా మారవచ్చు. ఉదాహరణకు ఎవరైనా కొన్ని రోజులు లేదా కొన్ని వారాల పాటు బ్రేక్ ఫాస్ట్, లంచ్, డిన్నర్‌‌లో మూడు పూటలా పుచ్చకాయ లేదా ఆపిల్‌ మాత్రమే తినవచ్చు. కాగా బరువు తగ్గడానికి సరైన రకమైన ఆహారాన్ని ఎంచుకునే ప్రక్రియను సులభతరం చేయడానికి మోనో డైట్ హామీ ఇస్తుంది. ఫుడ్ లాగింగ్, కార్బోహైడ్రేట్ కాలిక్యులేషన్, ఫ్యాట్ ట్రాకింగ్, కేలరీల లెక్కింపు అవసరం లేదు. పైగా ఈ పద్ధతి భోజనం తయారీ గురించిన అంచనాలను తొలగిస్తుంది. ఫాలో కావడాన్ని సులభతరం చేస్తుంది.

నష్టాలు

పోషక లోపాలు : ఏ ఒక్క ఆహారం శరీరానికి అవసరమైన అన్ని స్థూల, సూక్ష్మపోషకాలను అందించదు. ఒకే రకమైన ఆహారానికి పరిమితం చేయబడిన డైట్ విటమిన్, ఖనిజ లోపాలను కలిగిస్తుంది. ఇది అలసట, బలహీనత, దీర్ఘకాలిక ఆరోగ్య సమస్యలకు దారితీస్తుంది.

నెమ్మదించిన జీవక్రియ : ఒకే ఆహార సమూహంపై ఆధారపడటం అంటే తరచుగా అవసరమైన ప్రోటీన్లు, ఆరోగ్యకరమైన కొవ్వులు లేదా సంక్లిష్ట కార్బోహైడ్రేట్‌లను కోల్పోతారు. ఇది కండరాల నష్టానికి దారితీస్తుంది. జీవక్రియను నెమ్మదిస్తుంది. భవిష్యత్తులో బరువు నిర్వహణను మరింత కష్టతరం చేస్తుంది.

విషప్రయోగం ప్రమాదం : ఏదైనా ఒక ఆహారంలో ఎక్కువ భాగం హానికరం కావచ్చు. ఉదాహరణకు లేత కొబ్బరి నీరు అధిక పొటాషియం క్రమరహిత హృదయ స్పందనకు కారణమవుతుంది. చికెన్ బ్రెస్ట్ మాత్రమే తీసుకుంటే ఫైబర్, విటమిన్ సి లేకపోవడం, ఎక్కువ ప్రోటీన్ ఉండటం మూత్రపిండాలపై ఒత్తిడిని కలిగిస్తుంది.

మానసిక అనారోగ్యం : దీర్ఘకాలం ఈ పద్ధతినే ఫాలో అయితే మానసికంగా కూడా ఎఫెక్ట్ అవొచ్చు.