నమ్మకంతో నడిచే సంస్కృతి.. ఈ దుకాణంలో దుకాణదారుడు ఉండడు

దిశ, ఫీచర్స్: సాధారణంగా ఏదైనా దుకాణానికి వెళితే దుకాణదారు ఉంటాడు. కానీ నాగాలాండ్‌లోని డ్జులేక్ గ్రామంలో ఒక ప్రత్యేకమైన దుకాణం ఉంటుంది. ఈ దుకాణంలో దుకాణదారులు ఉండవు. తలుపులకు తాళాలు వేయరు. గేట్లు ఉండవు. కేవలం సమాజంపై నమ్మకంతోనే ఆ దుకాణం నడుస్తుంది. ఈ దుకాణంలో మొక్కలు, జ్యూస్ బాటిల్స్, స్నాక్స్ వంటి వస్తువులు బుట్టల్లో, రాక్‌లలో చక్కగా అమర్చబడి ఉంటాయి. ప్రతి వస్తువుపై ధరల ట్యాగ్‌లు స్పష్టంగా ఉంటాయి. కొనుగోలుదారులు తమకు కావాల్సిన వస్తువులను తీసుకుని టేబుల్‌పై ఉన్న ఒక లాక్ చేయబడిన క్యాష్ బాక్స్‌లో డబ్బులు వేస్తారు. ఈ విధానం కేవలం నాగాలాండ్‌కు మాత్రమే పరిమితం కాదు. మిజోరాంలో కూడా ఇలాంటి దుకాణాలు ఉన్నాయి. వీటిని స్థానికంగా ‘న్ఘా లౌ దౌర్’ అని పిలుస్తారు. ఈ సంప్రదాయం స్థానిక సంస్కృతిలో లోతుగా పాతుకుపోయిన నమ్మకం, సముదాయ విలువలపై ఆధారపడి ఉంటుంది. దశాబ్దాలుగా ఇవి నడుస్తున్నప్పటికీ సోషల్ మీడియాలో వీటి వీడియోలు, ఫోటోలు తాజాగా వైరల్ అవుతున్నాయి. ఈ విశ్వాసంతో నడిచే వ్యవస్థను చూసి చాలామంది ఆశ్చర్యపోతున్నారు. ఈ రోజుల్లో యూపీఐ చెల్లింపులు సర్వసాధారణంగా మారినప్పటికీ ఈ దుకాణాలు సాంప్రదాయిక నమ్మకంతో నడుస్తాయి. ఇది ఆధునిక టెక్నాలజీకి భిన్నమైన హృదయాన్ని హత్తుకునే అనుభవాన్ని అందిస్తుంది. ఈ దుకాణం కేవలం వస్తువులు అమ్మే చోటు మాత్రమే కాదు. మానవత్వం, నమ్మకం, పరస్పర గౌరవానికి చిహ్నం. చిన్న గ్రామాల్లోని ఇలాంటి చిన్న దుకాణాలు పెద్ద పెద్ద నగరాల్లో కనుమరుగవుతున్న విలువలను గుర్తు చేస్తున్నాయి. డబ్బు కంటే నమ్మకం పెద్దది.. ఆ నమ్మకమే మనల్ని నడిపిస్తుందనే సందేశాన్నిస్తోంది.