భార్యను కడతేర్చిన భర్త కారణం అదేనా..?
దిశ, కూకట్పల్లి: భార్య అందరితో కలుపుగోలుగా ఉండటం నచ్చక, భార్యపై అనుమానం పెంచుకున్న భర్త, భార్యను గొంతు నులిమి హత్య చేసిన సంఘటన కూకట్పల్లి పోలీస్ స్టేషన్ పరిధిలోని మూసాపేట్లో చోటు చేసుకుంది. సీఐ నరసింగరావు తెలిపిన వివరాల ప్రకారం ఒరిస్సా గజపతి జిల్లా కు చెందిన భాస్కర్ రావు గత కొన్ని ఏండ్ల క్రితం బతుకు దెరువు కోసం నగరానికి వలస వచ్చి మూసాపేట్లో నివాసం ఉంటున్నారు. భాస్కర్ రావుకు ముగ్గురు ఆడబిడ్డలు అందరికి వివాహం జరిపించాడు. చిన్న కూతురు భవాని అలియాస్ పుణ్యవతి(20)కి శ్రీకాకుళం జిల్లా హీరమండలం గొట్ట గ్రామానికి చెందిన బబ్బోని సంతోష్(28)కి ఇచ్చి 2021, మే 30వ తేదిన పెద్దల సమక్షంలో పెళ్లి జరిపించాడు. మూడు లక్షల కట్నం, మూడు తులాల బంగారం ఇచ్చాడు.
ఇదిలా ఉండగా సంతోష్ స్థానికంగా వెల్డింగ్ దుకాణంలో పని చేస్తుంటాడు. భార్య పుణ్యవతి తో కలిసి సంతోష్ మూసాపేట్ గూడ్స్షెడ్ రోడ్డులోని తులిప్ బార్ సమీపంలో ఇల్లు అద్దెకు తీసుకుని నివసిస్తున్నారు. కాగా వివాహం జరిగిన కొన్ని నెలలకే భార్యను మానసికంగా వేధించడం ప్రారంభించాడు. తన కుటుంబ సభ్యులతో మాట్లాడవద్దని, చుట్టుపక్కల వారితో మాట్లాడకుండా అడ్డుకుంటూ వేధించడం ప్రారంభించారు. ఈ క్రమంలో రెండు నెలల క్రితం పెద్ద మనుషుల సమక్షంలో నచ్చచెప్పడం జరిగింది. ఇదిలా ఉండగా గురువారం పుణ్యవతి ఇంటికి తాళం ఉండటంతో, సమీప బంధువు భాస్కర్ రావు ఇంటికి వెళ్లి పుణ్యవతి అక్కడికి వచ్చిందా అని అడగటంతో.. భాస్కర్ రావు పుణ్యవతి ఇంటికి వెళ్లి చూశాడు. భాస్కర్ రావుకు అనుమానం వచ్చి శుక్రవారం 7 గంటల ప్రాంతంలో ఇంటి తలుపులు బద్దలు కొట్టి చూడగా ఇంట్లో పుణ్యవతి శవమై కనిపించింది. తన కూతురు పుణ్యవతిని గొంతు నులిమి చంపి తన భర్త సంతోష్ బయటి నుంచి తాళం వేసుకుని పరారైనట్టు కూకట్పల్లి పోలీసులకు సమాచారం అందించాడు. దీంతో ఘటన స్థలానికి చేరుకున్న పోలీసులు వివరాలు సేకరించి భాస్కర్ ఇచ్చిన ఫిర్యాదు ఆధారంగా కేసు నమోదు చేసి, దర్యాప్తు చేస్తున్నారు. భర్త సంతోష్ గురించి గాలిస్తున్నారు.
