UGC-NET(June 2026):యూజీసీ నెట్ నోటిఫికేషన్ విడుదల.. పూర్తి షెడ్యూల్ ఇదే!

దిశ,వెబ్‌డెస్క్: ఎన్టీయే ఆధ్వర్యంలో ప్రతి ఏటా యూజీసీ నెట్ పరీక్షలను రెండు సార్లు నిర్వహిస్తుంటారు. ఈ తరుణంలో ఈ ఏడాది నిర్వహించే యూనివర్సిటీ గ్రాంట్స్ కమిషన్ నేషనల్ ఎలిజిబిలిటీ టెస్ట్ జూన్‌ 2026(UGC NET) పరీక్ష నోటిఫికేషన్‌ బుధవారం విడుదలైంది. జూనియర్ ఫెలోషిప్ అవార్డు, విశ్వవిద్యాలయాల్లో అసిస్టెంట్ ప్రొఫెసర్ పోస్టులకు పోటీపడేందుకు, పీహెచ్‌డీ ప్రవేశాలకు యూజీసీ నెట్ పరీక్ష ఉపయోగపడుతుంది. మొత్తం 85 సబ్జెక్టులకు గానూ ఈ పరీక్షలు నిర్వహిస్తారు. ఈ పరీక్ష కంప్యూటర్ ఆధారిత పరీక్ష (CBT) మోడ్‌లో జరుగుతుంది.

ఈ పరీక్షలకు దరఖాస్తు చేసుకునేవారు సంబంధిత సబ్జెక్టులో పీజీలో అర్హత పొంది ఉండాలి. పోస్ట్ గ్రాడ్యుయేషన్ (PG)లో కనీసం 55% మార్కులతో ఉత్తీర్ణత సాధించిన అభ్యర్థులు దరఖాస్తు చేసుకోవచ్చు. వయోపరిమితి (JRF): అభ్యర్థుల వయస్సు 30 ఏళ్ల కంటే తక్కువగా ఉండాలి. అసిస్టెంట్ ప్రొఫెసర్ పోస్టులకు ఎటువంటి వయోపరిమితి లేదు. ఆన్‌లైన్‌ దరఖాస్తులు ఏప్రిల్ 29వ తేదీ నుంచి మే 20, 2026వ తేదీ రాత్రి 11.50 గంటల వరకు చేసుకోవచ్చు. పూర్తి వివరాలకు యూజీసీ నెట్ అధికారిక https://ugcnet.nta.nic.in/వెబ్‌సైట్ సందర్శించండి.

UGC-NET June 2026 షెడ్యూల్‌ ఇదే..

యూజీసీ-నెట్‌ జూన్‌ 2026 ఆన్‌లైన్‌ దరఖాస్తులు ప్రారంభ తేదీ: 29 ఏప్రిల్ 2026.

ఆన్‌లైన్‌ దరఖాస్తులు, ఫీజు చెల్లింపులకు చివరి తేదీ: 20 మే 2026.

దరఖాస్తు సవరణ తేదీలు: మే 22 నుంచి 24 తేదీ రాత్రి 11.50 గంటల వరకు ఉంటుంది.

సిటీ ఇంటిమేషన్‌ స్లిప్‌లు విడుదల తేదీ: జూన్‌ 10, 2026 నుంచి అందుబాటులో ఉంటాయి.

అడ్మిట్ కార్డులు విడుదల తేదీ: జూన్‌ 15, 2026వ తేదీ నుంచి అందుబాటులో ఉంటాయి.

యూజీసీ-నెట్‌ జూన్‌ 2026 ఆన్‌లైన్‌ రాత పరీక్షల తేదీలు: జూన్‌ 22 నుంచి 30, 2026వ తేదీ వరకు జరుగుతాయి.

దరఖాస్తు ఫీజు: జనరల్ అభ్యర్థులు రూ.1150, ఈడబ్ల్యూఎస్‌, ఓబీసీ అభ్యర్ధులు రూ.600, ఎస్సీ, ఎస్టీ, పీడబ్ల్యూడీ, అభ్యర్ధులు రూ.325 చొప్పున చెల్లించాల్సి ఉంటుంది.

నోట్: ప్రస్తుతం పీజీ చదువుతున్న వారు కూడా దరఖాస్తు చేసుకోవచ్చు.