బడిగంట మోగింది... భవిష్యత్తు మొదలైంది!

విద్య పిల్లలకు జ్ఞానంతో పాటు ఆనందం, విలువలు, సృజనాత్మకతను అందించాలి. ప్రతి చిన్నారి జీవితంలో పాఠశాల అనేది కేవలం చదువు నేర్పే స్థలం కాదు. అది వ్యక్తిత్వాన్ని తీర్చిదిద్దే వేదిక, కలలను నిర్మించే ప్రదేశం, సమాజాన్ని అర్థం చేసుకునే మొదటి కిటికీ. అయితే నేడు విద్యావ్యవస్థను పరిశీలిస్తే కొన్ని ఆందోళనకరమైన ప్రశ్నలు మన ముందుకు వస్తున్నాయి. పిల్లలు బడికి వెళ్తున్నారా లేక పోటీ ప్రపంచానికి సిద్ధమవ్వాలనే ఒత్తిడిలోకి నెట్టబడుతున్నారా? వారి బాల్యం ఆనందంగా సాగుతోందా? లేక మార్కులు, ర్యాంకులు, పరీక్షల మధ్య నలిగిపోతుందా? పాఠశాలలు ప్రారంభమయ్యే ఈ సమయంలో ఈ ప్రశ్నలపై సమాజం మొత్తం ఆలోచించాల్సిన అవసరం ఉంది.

కొత్త విషయాలు తెలుసుకోవడం విద్యలో భాగమే!

మొదటిసారి బడికి వెళ్లే చిన్నారికి పాఠశాల ఒక కొత్త ప్రపంచం. కొత్త వాతావరణం, కొత్త మనుషులు, కొత్త నియమాల మధ్య భయం సహజమే. అయితే విద్య అంటే కేవలం పుస్తకాల పాఠాలు కాదు.. జీవితాన్ని అర్థం చేసు కోవడం కూడా. కానీ నేడు చాలామంది తల్లిదండ్రులు విద్యను మార్కులు, గ్రేడ్లు, ర్యాంకుల కోణంలోనే చూస్తుండ టంతో పిల్లలపై ఒత్తిడి పెరుగుతోంది. ట్యూషన్లు, హోంవర్క్, పోటీ పరీక్షల మధ్య బాల్యానికి అవసరమైన ఆటలు, స్నేహాలు, సృజనాత్మకత దూరమవుతున్నాయి. నిజమైన అభ్యాసం భయం నుంచి కాదు, ఆసక్తి నుంచి వస్తుంది. ప్రకృతిని గమనించడం, కథలు చదవడం, కుటుంబంతో మాట్లాడటం, కొత్త విషయాలు తెలుసు కోవడం కూడా విద్యలో భాగమే. పిల్లల మానసిక ఆరోగ్యంపై కూడా ప్రత్యేక శ్రద్ధ అవసరం. కుటుంబాల్లో సంభాషణ తగ్గిపోవడం, మొబైల్ ఫోన్ల వినియోగం పెరగడం వల్ల పిల్లల్లో ఒత్తిడి, ఆందోళన పెరుగుతున్నాయి. రోజూ కొంత సమయం పిల్లలతో మాట్లాడటం, వారి భావాలను వినడం, చిన్న విజయాలను అభినందించడం వారి ఆత్మవిశ్వాసాన్ని పెంచుతుంది.

ఈ నాలుగు శక్తులు కలిసి పనిచేస్తేనే..

అలాగే ఆటలు పిల్లల ఎదుగుదలకు ఎంతో అవసరం. పాఠశాల, ట్యూషన్ల మధ్య శారీరక చలనం తగ్గిపోవడంతో ఆరోగ్య సమస్యలు పెరుగుతున్నాయి. ఆటలు పిల్లలకు శారీరక దృఢత్వంతో పాటు మానసిక ఉల్లాసాన్ని కూడా అందిస్తాయి. ఆహారం, నిద్ర విషయంలోనూ జాగ్రత్త అవసరం. ఫాస్ట్ ఫుడ్, జంక్ ఫుడ్‌కు బదులుగా పోష కాహారం అందించడం కుటుంబాల బాధ్యత. అలాగే మొబైల్ ఫోన్లు, వీడియో గేమ్స్ వల్ల నిద్రకు భంగం కల గకుండా చూడాలి. సరైన ఆహారం, తగిన నిద్ర పిల్లల ఆరోగ్యా‌నికి, చదువులో ఏకాగ్రతకు, సమగ్ర అభివృద్ధికి ఎంతో కీలకం. పాఠశాలల బాధ్యత కూడా ఇక్కడే ముగియదు. ఉపాధ్యాయులు కేవలం పాఠాలు చెప్పేవారు మాత్రమే కాదు. వారు భవిష్యత్తును నిర్మించే శిల్పులు. ఒక మంచి ఉపాధ్యాయుడు పిల్లలలోని ప్రతిభను గుర్తించి ప్రోత్సహించగలడు. ఒక ప్రోత్సాహకరమైన మాట పిల్లల జీవితాన్ని మార్చగలదు. అందుకే విద్యా వ్యవస్థలో ఉపాధ్యాయుల పాత్రను మరింత గౌరవించాలి. తల్లిదండ్రులు, ఉపాధ్యాయులు, ప్రభుత్వం, సమాజం ఈ నాలుగు శక్తులు కలిసి పని చేస్తేనే పిల్లల భవిష్యత్తు బలపడు‌తుంది. పిల్లలను కేవలం పరీక్షల కోసం తయారు చేయకుండా జీవితానికి సిద్ధం చేయాలి. వారిలో మానవతా విలువలు, సృజనాత్మకత, సామాజిక బాధ్యత, నాయకత్వ లక్షణాలు పెంపొందించాలి.

పాఠశాల ఒత్తిడి కేంద్రం కాకూడదు!

ఈ కొత్త విద్యా సంవత్సరం ప్రారంభంలో మనం కూడా ఒక సంకల్పం చేసుకోవాలి. పిల్లల బాల్యాన్ని కాపాడుతూ, వారి కలలకు రెక్కలు ఇస్తూ, చదువును ఆనందంగా మార్చే వాతావరణాన్ని నిర్మించాలి. పాఠశాల భయపడే స్థలం కాకూడదు.. అన్వేషించే స్థలం కావాలి. ఒత్తిడి కేంద్రం కాకూడదు.. అవకాశాల ప్రపంచం కావాలి. ఎందుకంటే నేటి చిన్నారులే రేపటి భారతదేశ పౌరులు, శాస్త్రవేత్తలు, ఉపాధ్యాయులు, వైద్యులు, నాయకులు. వారు ఈ రోజు తరగతి గదుల్లో నేర్చుకునే విలువలే రేపటి సమాజ స్వరూపాన్ని నిర్ణయిస్తాయి. అందుకే విద్యను కేవలం పాఠ్యాంశాలకే పరిమితం చేయకుండా, మంచి మను షులను తీర్చిదిద్దే ప్రక్రియగా చూడాలి. ప్రతి చిన్నారి చిరు నవ్వుతో బడికి వెళ్లి, ఆత్మవిశ్వాసంతో తిరిగి వచ్చే రోజే నిజమైన విద్య విజయవంతమైన రోజు అవుతుంది. అదే మన సమాజ పురోగతికి, దేశ భవిష్యత్తుకు బలమైన పునాది. పిల్లల చేతిలో పుస్తకం పెట్టడం విద్య ప్రారంభం కావచ్చు. కానీ వారి హృదయంలో ఆత్మవిశ్వాసం, మానవత్వం, కలలు నాటినప్పుడే నిజమైన విద్య సార్థకం అవుతుంది.

-సందీప్ కూర్మచలం

97010 08887