తిరుమలలో కొనసాగుతున్న భక్తుల రద్దీ.. బాటగంగమ్మ గుడివరకూ క్యూలైన్ !

దిశ, వెబ్‍డెస్క్: కలియుగ దైవం శ్రీ వేంకటేశ్వర స్వామిని దర్శించుకునేందుకు భక్తులు భారీ సంఖ్యలో తరలివస్తున్నారు. ప్రస్తుతం తిరుమలలో భక్తుల రద్దీ కొనసాగుతోంది. ఉచిత దర్శనం (సర్వదర్శనం) కోసం వేచి ఉన్న భక్తులతో వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లు నిండిపోయాయి. క్యూలైన్ వెలుపల బాట గంగమ్మ గుడి వరకు భక్తులు వేచి ఉన్నారు.

భక్తుల రద్దీ దృష్ట్యా వివిధ దర్శన టోకెన్లు ఉన్న, లేని భక్తులకు స్వామివారి దర్శనానికి పట్టే సమయాలను టీటీడీ (TTD) అధికారులు వెల్లడించారు. టోకెన్లు లేని భక్తులకు స్వామివారి దర్శనం కలగడానికి సుమారు 24 గంటల సమయం పడుతుందని పేర్కొన్నారు. రూ. 300 శీఘ్రదర్శనం ప్రత్యేక ప్రవేశ దర్శనం టిక్కెట్లు కలిగిన భక్తులకు 5 గంటల సమయం పడుతోంది. ఇప్పటికే సర్వదర్శనం టోకెన్లు పొందిన భక్తులకు దర్శనం కోసం 7 గంటల సమయం పడుతోంది.

గురువారం నాడు తిరుమల క్షేత్రంలో భక్తుల సందడి నెలకొంది. మొత్తం 59,186 మంది భక్తులు స్వామివారిని దర్శించుకున్నారు. మొక్కులు చెల్లించుకోవడంలో భాగంగా 27,244 మంది భక్తులు స్వామివారికి తలనీలాలు సమర్పించారు. శ్రీవారి హుండీ ద్వారా నిన్న ఒక్కరోజే రూ. 4.06 కోట్ల ఆదాయం వచ్చినట్లు ఆలయ అధికారులు తెలిపారు. క్యూలైన్లలో వేచి ఉన్న భక్తులకు ఎటువంటి ఇబ్బందులు కలగకుండా టీటీడీ సిబ్బంది నిరంతరం పర్యవేక్షిస్తూ, మంచినీరు, అన్నప్రసాదాలను అందిస్తున్నారు.