బార్ అండ్ రెస్టారెంట్లో భారీ అగ్నిప్రమాదం.. లక్షల రూపాయల ఆస్తి నష్టం
బార్ అండ్ రెస్టారెంట్లో భారీ అగ్ని ప్రమాదం చోటచేసుకున్న ఘటన మహబూబాబాద్ జిల్లా మరిపెడ మండల కేంద్రంలో శుక్రవారం తెల్లవారుజామున చోటుచేసుకుంది.
దిశ, వెబ్డెస్క్/మరిపెడ: విద్యుత్ షార్ట్ సర్క్యూట్ కారణంగా బార్ అండ్ రెస్టారెంట్లో అగ్ని ప్రమాదం సంభవించి భారీ ఆస్తి నష్టం వాటిల్లింది. ఈ ఘటన మహబూబాబాద్ జిల్లా మరిపెడ మండల కేంద్రంలో శుక్రవారం తెల్లవారుజామున చోటుచేసుకుంది. పోలీసులు, అగ్నిమాపక సిబ్బంది తెలిపిన వివరాల ప్రకారం.. మున్సిపల్ కేంద్రంలోని సెవెన్ హిల్స్ బార్ అండ్ రెస్టారెంట్లో ఈ తెల్లవారుజామున 5.30 ప్రాంతంలో పొగలు రావడంతో అటుగా వచ్చిన వాకర్స్, రైతులు, అగ్నిమాపక సిబ్బందితో పాటు పోలీసులకు సమాచారం అందజేశారు. హుటాహుటిన ఘటనా స్థలానికి చేరుకున్న ఫైర్ సిబ్బంది 2 గంట పాటు తీవ్రంగా శ్రమించి మంటలార్పారు. విద్యుత్ షార్ట్ సర్క్యూట్ కారణంగానే అగ్ని ప్రమాదం సంభవించినట్లుగా తెలుస్తోంది. కాగా, ఈ ప్రమాదంలో రెండు ద్విచక్ర వాహనాలు, సుమారు రూ.40 లక్షల ఆస్తి, లిక్కర్ నష్టం వాటిల్లినట్లు బార్ యజమాని దుబ్బాక నరేష్రెడ్డి వెల్లడించారు. అనుకోకుండా జరిగిన ప్రమాదంతో కౌంటర్లో ఉన్న ముఖ్యమైన ఫైల్స్, కొంత నగదు మంటల్లో కాలిపోయినట్లుగా ఆయన తెలిపారు.
