ఎదురెదురుగా ఢీకొన్న గూడ్స్ రైళ్ళు.. లోకో పైలట్ మృతి
దిశ, డైనమిక్ బ్యూరో: మధ్యప్రదేశ్ ఘోర రైలు ప్రమాదం జరిగింది. బుధవారం ఉదయం శాహ్డోల్ జిల్లాలోని సింగ్పుర్ రైల్వే స్టేషన్ సమీపంలో రెండు గూడ్స్ రైళ్లు పరస్పరం ఢీకొన్నాయి. దీంతో ఒక్కసారిగా మంటలు చెలరేగాయి. ఈ ఘటనలో లోకో పైలట్ మరణించగా మరో ఐదుగురు గాయపడ్డారు. పోలీసులు తెలిపిన వివరాల ప్రకారం.. ఉదయం 6.45 గంటల సమయంలో సింగ్పుర్ రైల్వే స్టేషన్ సమీపంలో ఓ గూడ్స్ రైలు ఆగింది. అదే సమయంలో అదే ట్రాక్లో వచ్చిన మరో గూడ్స్ ట్రైన్ ఢీ కొట్టింది. దీంతో ఒక్కసారిగా మంటల చెలరేగాయి. ఒక రైలు భోగీలు, మరో రైలుపై పడగా.. ట్రాక్ మొత్తం ధ్వంసమైంది. ఈ ఘటనలో లోకో పైలట్ రాజేశ్ ప్రసాద్ గుప్తా అక్కడికక్కడే మృతి చెందాడు. మరో ఐదుగురు రైల్వే సిబ్బంది గాయపడ్డారు. వారిని హుటాహుటిన స్థానికంగా ఉన్న వైద్య కళాశాలలో చేర్పించారు. అందులో ఇద్దరి పరిస్థితి విషమంగా ఉన్నట్లు అధికారులు తెలిపారు.
