కామాంధుడి కన్ను.. చిన్నారి పై వేధింపులు

దిశ, దమ్మపేట : వరుసకు బంధువయ్యే వ్యక్తి ఆ బాలికకు అండగా ఉండాల్సింది పోయి.. ఆ చిన్నారిపైనే కన్నేశాడు. సభ్యసమాజం తలదించుకునేలా ఏడో తరగతి చదువుతున్న బాలిక పై లైంగిక వేధింపులకు పాల్పడ్డాడు. ఈ ఘటన దమ్మపేట మండలంలో కలకలం రేపింది. వివరాల్లోకి వెళ్తే మండలంలోని ఓ గ్రామానికి చెందిన బాలిక పాఠశాలలో 7వ తరగతి చదువుతోంది. కుటుంబానికి అత్యంత సన్నిహితుడు, వరుసకు దగ్గరి బంధువయ్యే వ్యక్తి ఆ బాలికను లైంగికంగా వేధిస్తున్నాడని తల్లి తల్లడిల్లిపోయింది. జరిగిన దారుణం పై బాధితురాలి తల్లి వెంటనే దమ్మపేట పోలీసులకు ఫిర్యాదు చేసింది. కేసు పరిగణనలోకి తీసుకున్న ఎస్సై సాయి కిషోర్ రెడ్డి నిందితుడి పై కఠినమైన పోక్సో చట్టం కింద కేసు నమోదు చేశారు. ఈ మేరకు దర్యాప్తును ముమ్మరం చేశారు. మైనర్ల పై ఇటువంటి అఘాయిత్యాలకు పాల్పడే మృగాలను విడిచిపెట్టే ప్రసక్తి లేదని, నిందితుడికి కఠిన శిక్ష పడేలా చూస్తామని ఎస్సై తెలిపారు.