నీటి గుంటలో పడి బాలిక మృతి

దిశ, బెజ్జూర్ : నీటి గుంటలో పడి బాలిక మృతి చెందిన సంఘటన కొమురం భీం జిల్లా, బెజ్జూర్ మండలం, తలాయి గ్రామంలో శనివారం సాయంత్రం జరిగింది. గ్రామస్థుల కథనం ప్రకారం బెజ్జూరు మండలం తలాయి గ్రామానికి చెందిన పానం అర్చన (8) ప్రాథమిక పాఠశాలలో రెండవ తరగతి చదువుతుంది. మధ్యాహ్న భోజనం తర్వాత బహిర్భూమికి వెళ్లిన బాలిక ప్రమాదవశాత్తు నీటి గుంతలో పడి మృతి చెందింది.

శనివారం పాఠశాల నుంచి బహిర్భూమికి వెళ్లి తిరిగి రాకపోవడంతో స్థానికులు గాలింపు చర్యలు చేపట్టారు. అప్పటికే బాలిక నీటిగుంటలో పడి మృతి చెందినట్లు గ్రామస్తులు తెలిపారు. అయితే కొన్ని రోజులుగా ఈ బాలికకు మతిస్థిమితం లేదని స్థానికులు చెబుతున్నారు. సంఘటన స్థలాన్ని బెజ్జూర్ ఎస్సై వెంకటేష్ సందర్శించి కేసు నమోదు చేసుకుని దర్యాప్తు చేస్తున్నారు.