పోటీకి విపక్షాలు దూరం.. నిజామాబాద్ లో కవిత ఏకగ్రీవం..?

దిశ ప్రతినిధి, నిజామాబాద్ : నిజామాబాద్ స్థానిక సంస్థల శాసన మండలి ఎన్నికలకు దూరంగా ఉండాలని ఉమ్మడి జిల్లా కాంగ్రెస్ పార్టీ నాయకులు నిర్ణయించుకున్నారు. ఇటీవల ఖాళీ అయిన శాసనమండలి స్థానానికి సంఖ్యా బలం లేకపోవడంతో ఈ నిర్ణయం తీసుకున్నారు. మాజీ మంత్రి షబ్బీర్ అలీ , మాజీ మంత్రి సుదర్శన్ రెడ్డి, పీసీసీ ప్రచార కమిటీ చైర్మన్ మధుయాష్కీ గౌడ్, పీసీసీ కార్యనిర్వాహక అధ్యక్షులు మహేష్ కుమార్ గౌడ్ , మాజీ ప్రభుత్వ విప్ ఈరవత్రి అనిల్, నిజామాబాద్ జిల్లా అధ్యక్షులు మానాల మోహన్ రెడ్డి ,కామారెడ్డి జిల్లా కాంగ్రెస్ అధ్యక్షులు కైలాష్ శ్రీనివాస్, అసెంబ్లీ నియోజకవర్గాల్లో పోటీ చేసిన అభ్యర్థులు కలిసి చర్చించి ఈ నిర్ణయం ప్రకటించారు.

ఇప్పటికే బీజేపీ పోటీకి దూరం..

స్థానిక సంస్థల ఎమ్మెల్సీ ఎన్నికల్లో బీజేపీ పోటీ చేయడం లేదని ఇది వరకే ఆ పార్టీ అధ్యక్షులు బండి సంజయ్ ప్రకటన చేశారు. లోకల్ బాడీ లో 54 మంది ఓటర్లు ఉండగా బీజేపీ పోటీ నుంచి విరమించుకోవడం విశేషం.

ఆరు నామినేషన్ పత్రాలు..

ఎమ్మెల్సీ ఎన్నికలలో చివరి రోజు మంగళవారం వరకు 6 నామినేషన్ పత్రాలు తీసుకున్నారు అని తెలిసింది. చివరి రోజు వరకు ఒక్క నామినేషన్ దాఖలు కాలేదు. మంగళవారం లోపు ఎమ్మెల్సీ గా కవిత నామినేషన్ వేయనున్నారు. ఒక్కటే నామినేషన్ దాఖలు చేస్తే మాత్రం ఎన్నిక ఎకగ్రీవం కావడం ఖాయం.