మీ సొంత అనుభవాలే మిమ్మల్ని మరింత మెరుగుపరుస్తాయి: ఐశ్వర్య రాయ్

దిశ, సినిమా: ప్రపంచ సుందరి, బాలీవుడ్ ఎగర్‌గ్రీన్ బ్యూటీ ఐశ్వర్యా రాయ్ బచ్చన్ ఈ ఏడాది కేన్స్ ఫిల్మ్ ఫెస్టివల్ లో తన గ్రాండ్ ఎంట్రీతో మరోసారి అందరినీ మంత్రముగ్ధులను చేసింది. దాదాపు మూడు దశాబ్దాలుగా సినీ పరిశ్రమలో అగ్ర నటిగా కొనసాగుతున్న ఐశ్వర్య, కేన్స్ వేదికగా చేసిన వ్యాఖ్యలతో ఇండస్ట్రీలోకి వచ్చే యువ నటీనటులకు కొన్ని విలువైన సూచనలు చేశారు. ప్రస్తుతం ప్రతిదీ కృత్రిమంగా మారుతున్న ఈ ప్రపంచంలో తమను తాము ఎలా నిలబెట్టుకోవాలో ఆమె వివరించారు . ఐశ్వర్య మాట్లాడుతూ.. "కళా ప్రపంచంలో ప్రతి రోజూ ఒక కొత్త రోజే. సృజనాత్మకత ద్వారా మనల్ని మనం నిరంతరం ఆవిష్కరించుకుంటూనే ఉండాలి. నా విషయానికి వస్తే, ప్రేక్షకులు నాపై చూపిస్తున్న ప్రేమాభిమానాలకు నేను ఎప్పుడూ కృతజ్ఞతురాలినే. ఈ కళా ప్రపంచంలో ప్రతి ఒక్కరి ప్రయాణం విభిన్నంగా ఉంటుంది.

మీ సొంత అనుభవాలే మిమ్మల్ని మరింత మెరుగుపరుస్తాయి. ఇక్కడ ఏది తప్పు, ఏది ఒప్పు అని చెప్పలేం, ఎవరి దారి వారిదే. కాబట్టి యువ నటులకు నేను చెప్పేది ఒక్కటే.. మీ ఫ్యాషన్‌ను నమ్మి, మీరు తీసుకునే నిర్ణయాలకు కట్టుబడి ఉండండి." అని చెప్పారు. ప్రస్తుత సినిమా ప్రపంచం గురించి మాట్లాడుతూ.. "ఈ రోజుల్లో చుట్టూ జరుగుతున్న విషయాలను మనం ముందే ఊహించలేం. ప్రస్తుతం సమాజంలో చాలా విషయాలు ముందే ప్లాన్ చేసి, కృత్రిమంగా సృష్టించబడుతున్నాయి. అలా కాకుండా జీవితాన్ని సహజంగా అనుభవించి, ఆ అనుభవాలనే మీ నటనలోకి తీసుకురావాలి. అప్పుడే అందులో మ్యాజిక్ ఉంటుంది. మీకు మీరే ఒక మంచి స్నేహితుడిగా మారి, మీపై మీకు నమ్మకం ఉండాలి. మీ విషయంలో మీరు ఎప్పుడూ నిజాయితీగా ఉండాలి" అని ఆమె వివరించారు.