దేవుళ్ల ఉనికి లేకుండా.. మానసిక పోరాటంగా ‘ది ఒడిస్సీ’

దిశ, వెబ్‌డెస్క్: ప్రఖ్యాత దర్శకుడు క్రిస్టోఫర్ నోలన్ తెరకెక్కించిన తాజా భారీ చిత్రం 'ది ఒడిస్సీ' (The Odyssey) ప్రస్తుతం అంతర్జాతీయ స్థాయిలో చర్చనీయాంశమైంది. మ్యాట్ డామన్ ప్రధాన పాత్రలో గ్రీక్ పురాణ ఇతిహాసం ఆధారంగా రూపొందిన ఈ చిత్రం ప్రేక్షకులను విశేషంగా ఆకట్టుకుంటోంది. క్రీస్తు పూర్వం నాటి ప్రసిద్ధ గ్రీక్ కవి హోమర్ రాసిన 'ఒడిస్సీ' కావ్యాన్ని నోలన్ తన సొంత శైలికి అనుగుణంగా మార్చి తెరకెక్కించారు. హోమర్ కథలో దేవతల (Gods) పాత్ర అత్యంత కీలకం కాగా, నోలన్ మాత్రం తన సినిమాలో దేవతల ఉనికిని దాదాపుగా తొలగించారు.

దేవతల పాత్ర లేకపోవడం..

అసలు కథలో పొసైడన్ అగ్రహం, ఎథీనా రక్షణ, జ్యూస్ న్యాయ నిర్ణయాలు ప్రధాన పాత్ర పోషిస్తాయి. కానీ నోలన్ ఈ సినిమాలో వాటిని దైవిక శక్తిగా కాకుండా సముద్ర తుఫానులుగా, కథానాయకుడి మనస్సాక్షిగా భావించేలా అస్పష్టంగా చిత్రీకరించారు. హోమర్ కావ్యంలో ఒడిసియస్ మితిమీరిన అహంకారం, గర్వం ఉన్న నాయకుడు. కానీ నోలన్ తన సినిమాలో ఆయనను యుద్ధం వల్ల తీవ్ర మానసిక క్షోభకు (Trauma) గురైన ఒక పోరాటయోధుడిగా మలిచారు. పశ్చాత్తాపంతో రగిలిపోయే మనిషిగా చూపించడం వల్ల ప్రేక్షకులకు కథానాయకుడిపై సానుభూతి కలుగుతుంది.

సాంకేతిక విజువల్ వండర్..

హోమర్ కావ్యంలోని దేవతల శక్తులను తగ్గించినప్పటికీ, నోలన్ తనదైన విజువల్ వండర్తో ఆకట్టుకున్నారు. ఐమాక్స్ (IMAX) స్కేల్లో తీసిన సముద్ర సన్నివేశాలు, ట్రోజన్ హార్స్ సెట్ పీస్ సినిమాకు ప్రధాన ఆకర్షణగా నిలిచాయి. లుడ్విగ్ గోరాన్సన్ బ్యాక్ గ్రౌండ్ స్కోర్ భావోద్వేగాలను పండించడంలో కీలక పాత్ర పోషించింది. పెనెలోప్‌గా ఆన్ హాత్వే, ఆంటినోస్‌గా రాబర్ట్ ప్యాటిన్సన్, ఎథీనాగా జెండయా తమ పాత్రల్లో ఒదిగిపోయారు. మొత్తానికి ఇది హోమర్ రాసిన ఒడిస్సీని ఉన్నది ఉన్నట్లుగా తీసిన సినిమా కాదు.. హోమర్ కావ్యానికి నోలన్ ఇచ్చిన ఒక సరికొత్త రూపమని సినీ విశ్లేషకులు అభిప్రాయపడుతున్నారు.