బాలయ్యతో స్టార్ డైరెక్టర్.. బ్లాక్బస్టర్ కాంబో సిద్ధం
బాలకృష్ణ–అనిల్ రావిపూడి కాంబినేషన్లో మరో సినిమా రానున్నట్లు వార్తలు వినిపిస్తున్నాయి.
దిశ, వెబ్ డెస్క్: బాలయ్య ప్రస్తుతం గోపీచంద్ మలినేని దర్శకత్వంలో తెరకెక్కుతున్న చిత్రంలో నటిస్తున్నారు. ఇదే సమయంలో వరుసగా కొత్త ప్రాజెక్ట్లకు గ్రీన్ సిగ్నల్ ఇస్తూ ఫుల్ బిజీగా ఉన్నారు. ఇప్పటికే కొరటాల శివ దర్శకత్వంలో ఓ సినిమా చేయడానికి అంగీకరించగా, ఆ చిత్రానికి సంబంధించిన పూజా కార్యక్రమాలు కూడా పూర్తయ్యాయి. ఈ మూవీ రెగ్యులర్ షూటింగ్ మరికొద్ది రోజుల్లో ప్రారంభం కానుంది. అలాగే వివేక్ ఆత్రేయ దర్శకత్వంలోనూ బాలయ్య ఓ సినిమా చేయనున్నారనే వార్తలు ఇండస్ట్రీ వర్గాల్లో వినిపిస్తున్నాయి. ఇలాంటి సమయంలో మరో ఆసక్తికర వార్త టాలీవుడ్లో చక్కర్లు కొడుతోంది.
దర్శకుడు అనిల్ రావిపూడి ఇటీవల బాలకృష్ణకు ఓ కథ వినిపించగా, అది ఆయనకు బాగా నచ్చిందని సమాచారం. దీంతో మరోసారి అనిల్ దర్శకత్వంలో నటించేందుకు బాలయ్య గ్రీన్ సిగ్నల్ ఇచ్చినట్లు ప్రచారం జరుగుతోంది. అనిల్ రావిపూడి ప్రస్తుతం వెంకటేష్, కళ్యాణ్ రామ్ ప్రధాన పాత్రల్లో ఓ చిత్రాన్ని తెరకెక్కిస్తున్నారు. ఆ సినిమా షూటింగ్ పూర్తయ్యాక బాలయ్య ప్రాజెక్ట్పై దృష్టి పెట్టనున్నట్లు టాక్ వినిపిస్తోంది. ఇప్పటికే బాలకృష్ణ–అనిల్ రావిపూడి కాంబినేషన్లో వచ్చిన 'భగవంత్ కేసరి' మంచి విజయాన్ని అందుకుంది. దీంతో ఈ క్రేజీ కాంబో మరోసారి రిపీట్ అవుతుందా? అనే ఆసక్తి అభిమానుల్లో నెలకొంది. అయితే ఈ ప్రాజెక్ట్పై అధికారిక ప్రకటన రావాల్సి ఉంది.
