Ajith Kumar: కష్ట సమయాల్లో భరోసా ఇచ్చింది.. నా సక్సెస్‌ క్రెడిట్ ఆమెకే ఇస్తానంటూ అజిత్ కుమార్ ఆసక్తికర కామెంట్స్

దిశ, సినిమా: కోలీవుడ్ స్టార్ హీరో అజిత్ కుమార్(Ajith Kumar) విదాముయార్చి, గుడ్ బ్యాడ్ అగ్లీ(Good Bad Ugly) వంటి సినిమాలతో ప్రేక్షకుల ముందుకు వచ్చారు. అయితే ఈ రెండు చిత్రాలు పెద్దగా మెప్పించలేకపోయాయి. అయితే అజిత్ కుమార్ ఓ వైపు వరుసగా మూవీస్‌ చేస్తూనే మరోవైపు రేసింగ్‌లోనూ పాల్గొంటూ అందరి చేత ప్రశంసలు పొందుతున్నారు. ఇక ఇటీవల ఆయనకు ప్రభుత్వం పద్మభూషణ్ అవార్డును కూడా అందజేసిన విషయం తెలిసిందే. ఈ క్రమంలో.. తాజాగా, ఓ ఇంటర్వ్యూలో పాల్గొన్న అజిత్ కుమార్ ఆసక్తికర వ్యాఖ్యలు చేశారు. ‘‘నేను ఇంత పెద్ద విజయాన్ని సాధించానని గుర్తొస్తే ఆశ్చర్యంగా అనిపిస్తుంది.

అయితే నేను ఇప్పుడు ఈ స్థాయిలో ఉండటానికి ప్రధాన కారణం నా భార్య శాలిని(Shalini) అని చెప్తాను. నా కోసం ఎన్నో త్యాగాలు చేసింది. అంతేకాకుండా నా ప్రతి పనిలోనూ ఆమె నాకు తోడుగా నిలిచింది. కొన్నిసార్లు సరైన నిర్ణయాలు తీసుకోకపోయినా నాకు అండగా ఉంది. నన్ను ఎప్పుడూ నిరుత్సాహ పరచలేదు. నా కష్ట సమయాల్లో పక్కనే ఉండి భరోసానిచ్చింది. కాబట్టి నా జీవితంలో సాధించిన సక్సెస్ క్రెడిట్ అంతా ఆమెకే ఇస్తా. ఆమె ఫేమస్ నటి అయినప్పటికీ నా కోసం అన్నిటిని వదిలేసింది. ఎంతోమంది అభిమానులు ఉన్నారు. వారికి నేను కృతజ్ఞతలు తెలియజేస్తున్నాను’’ అని చెప్పుకొచ్చారు. ప్రస్తుతం ఇందుకు సంబంధించిన వీడియో నెట్టింట వైరల్ అవుతోంది.