విజయ్ దేవరకొండతో పెళ్లి.. పుకార్లపై నిహారిక క్లారిటీ
విజయ్ దేవరకొండతో పెళ్లి రూమర్స్పై ఫుల్ క్లారిటీ ఇచ్చిన నిహారిక.
దిశ, వెబ్ డెస్క్: కొంతకాలం క్రితం మెగా డాటర్ నిహారిక మరియు విజయ్ దేవరకొండ పెళ్లి చేసుకోబోతున్నారని పెద్ద ఎత్తున పుకార్లు వచ్చిన విషయం తెలిసిందే. తాజాగా ఆ రూమర్స్పై నిహారిక క్లారిటీ ఇచ్చింది. నిహారిక తాజాగా నిర్మించిన రాకాస చిత్రం ఏప్రిల్ 3న విడుదలకు సిద్ధమవుతోంది. ఈ సినిమా ప్రమోషన్స్లో భాగంగా ఇచ్చిన ఓ ఇంటర్వ్యూలో ఆమెకు గతంలో వచ్చిన పెళ్లి పుకార్లపై ప్రశ్న ఎదురైంది. దీనికి స్పందించిన నిహారిక... కొంతకాలం క్రితం తాను మరియు విజయ్ దేవరకొండ పెళ్లి చేసుకోబోతున్నట్లు పెద్ద ఎత్తున వార్తలు వచ్చాయని తెలిపింది.
అదే సమయంలో అనుకోకుండా తాము ఇద్దరం ఒక సినిమా ఈవెంట్లో కలిసినట్లు చెప్పింది. ఆ సమయంలో ఆ వార్తలు మరింత వైరల్ అవుతుండటంతో, విజయ్ దేవరకొండ స్వయంగా స్పందిస్తూ — నిహారిక తనకు చెల్లెలు లాంటిదని క్లారిటీ ఇచ్చారని నిహారిక వెల్లడించింది. అలాగే తాను నటించిన గీత గోవిందం సినిమాలో నాగబాబు తనకు తండ్రి పాత్రలో నటించారని, అందుకే నిహారికను చెల్లెలుగా భావిస్తానని విజయ్ అప్పట్లో చెప్పారని తెలిపింది. ఇక నిహారిక నిర్మించిన రాకాస చిత్రంలో సంగీత్ శోభన్ హీరోగా నటించగా, నయన్ సారిక హీరోయిన్గా నటించింది. ఈ చిత్రానికి మానస శర్మ దర్శకత్వం వహించారు.
