కింగ్ vs టాక్సిక్: బాక్స్ ఆఫీస్ షేక్ కానుందా?
షారుఖ్ ఖాన్ ‘కింగ్’ మరియు యష్ ‘టాక్సిక్’ చిత్రాలు డిసెంబర్ 24న విడుదలయ్యే అవకాశం ఉన్నట్లు తెలుస్తోంది.
దిశ, వెబ్ డెస్క్: సినిమా ఇండస్ట్రీలో కొన్ని సందర్భాల్లో ఒకే రోజున భారీ క్రేజ్ ఉన్న సినిమాలు విడుదల అవుతూ ఉంటాయి. అలాంటి సందర్భాల్లో రెండు సినిమాలకు డ్యామేజ్ జరిగే అవకాశం ఉంటుంది. దీనికి అనేక కారణాలు ఉన్నాయి. మొదటగా చూస్తే, భారీ క్రేజ్ ఉన్న సినిమా సింగిల్గా విడుదల అయితే ప్రపంచవ్యాప్తంగా పెద్ద ఎత్తున థియేటర్లు లభిస్తాయి. అదే సమయంలో ఆ సినిమాతో పాటు మరో భారీ మూవీ విడుదల అయితే థియేటర్ల సంఖ్య తగ్గే అవకాశం ఉంటుంది. అలాగే రెండు సినిమాల్లో ఏదైనా ఒక సినిమాకు యావరేజ్ టాక్ వస్తే ఆ సినిమాకు కలెక్షన్లు గణనీయంగా తగ్గే అవకాశం ఉంటుంది. ఇక హిట్ టాక్ వచ్చిన సినిమాపై కూడా కొంత మేర ప్రభావం పడే అవకాశం ఉంటుంది. అందుకే మేకర్స్ సాధారణంగా భారీ సినిమాలను ఒకే తేదీన విడుదల చేయడానికి ఇష్టపడరు. కనీసం వారం గ్యాప్ ఉండేలా ప్లాన్ చేస్తారు.
అయితే ఈ ఏడాది రెండు భారీ సినిమాల మధ్య బాక్సాఫీస్ వద్ద గట్టి పోటీ నెలకొనే అవకాశం ఉన్నట్లు తెలుస్తోంది. బాలీవుడ్ బాద్షా షారుఖ్ ఖాన్ ప్రస్తుతం ‘కింగ్’ అనే చిత్రంలో నటిస్తున్న విషయం తెలిసిందే. ఈ సినిమాపై భారీ అంచనాలు ఉన్నాయి. ఇక కన్నడ స్టార్ హీరో యష్ ప్రస్తుతం ‘టాక్సిక్’ అనే చిత్రంలో నటిస్తున్నాడు. ఈ రెండు సినిమాలను కూడా ఈ ఏడాది డిసెంబర్ 24న విడుదల చేయాలని మేకర్స్ ప్లాన్ చేస్తున్నట్లు సమాచారం. ఇదే గనుక జరిగితే ఈ రెండు భారీ సినిమాల మధ్య బాక్సాఫీస్ వద్ద తీవ్రమైన పోటీ నెలకొని, ఇండస్ట్రీలో హై వోల్టేజ్ వాతావరణం ఏర్పడే అవకాశం ఉందని సినీ విశ్లేషకులు అభిప్రాయపడుతున్నారు.
