ప్రతిభావంతులైన నటీనటులతో కలిసి పనిచేయడం నా అదృష్టంగా భావిస్తున్నా: అక్షర సింగ్

దిశ, సినిమా: భోజ్‌పురి స్టార్ నటి, సోషల్ మీడియా సెన్సేషన్ అక్షర సింగ్ ‘వెల్‌కమ్ టు ది జంగిల్’ చిత్రంతో బాలీవుడ్ ఇండస్ట్రీకి ఎంట్రీ ఇవ్వనుంది. స్టార్ హీరో అక్షయ్ కుమార్ ప్రధాన పాత్రలో నటిస్తున్న ఈ కామెడీ ఫ్రాంచైజీలో సునీల్ శెట్టి, జాకీ ష్రాఫ్, రవీనా టాండన్, దిశా పటాని, జాక్వెలిన్ ఫెర్నాండెజ్, అర్షద్ వార్సి, పరేష్ రావల్ కీలక పాత్రలో కనిపించబోతున్నారు. దాదాపు రెండు దశాబ్దాల తర్వాత అక్షయ్ కుమార్, రవీనా టాండన్ క్రేజి కాంబోలో ఈ సినిమాతో తిరిగి రావడం విశేషం. ఫిరోజ్ నడియాద్వాలా నిర్మించగా.. పక్క ఫ్యామిలీ ఎంటర్‌టైనర్‌గా రాబోతుంది. అహ్మద్ ఖాన్ దర్శకత్వంలో రాబోతుండగా.. షూటింగ్ పూర్తి చేసుకున్న ఈ మల్టీస్టారర్ సినిమా జూన్ 26న విడుదల కాబోతోంది.

ఈక్రమంలో.. ప్రమోషన్స్ జోరు పెంచిన మూవీ మేకర్స్ ఓ మాస్ సాంగ్‌ను విడుదల చేసి హైప్ క్రియేట్ చేశారు. ఇందులో అక్షయ్‌కి జోడీగా చేసిన అక్షర సింగ్ ఒక్క పాటతోనే సోషల్ మీడియాలో సెన్సేషన్ క్రియేట్ చేస్తుందనడంలో అతిశయోక్తి లేదు. తాజాగా, ఓ ఇంటర్వ్యూలో భాగంగా అక్షర సింగ్ తన సంతోషాన్ని అందరితో పంచుకుంటూ, తన సొంత రాష్ట్రమైన బిహార్ ప్రజలపై ఉన్న ప్రేమను చాటుకున్నారు. ‘‘ఒక బిహారీగా నాకు బాలీవుడ్‌లో ఇంతటి గొప్ప వేదిక లభించడం చాలా గర్వంగా ఉంది. ముఖ్యంగా స్టార్ హీరో అక్షయ్ కుమార్‌తో కలిసి స్క్రీన్ షేర్ చేసుకునే అవకాశం రావడం నా అదృష్టం. ఈ సినిమాలో ఎంతోమంది ప్రతిభావంతులైన నటీనటులు ఉన్నారు, వారందరితో కలిసి పనిచేయడం నా అదృష్టంగా భావిస్తున్నాను. నేను ఈ రోజు ఈ స్థితిలో ఉన్నానంటే దానికి కారణం నా బిహార్ ప్రజల ప్రేమ, వారి ఆశీస్సులే" అని అక్షర సింగ్ ఎమోషనల్ అయ్యారు.