‘ఆస్కార్’ లవర్స్‌కు గుడ్ న్యూస్.. ఇక యూట్యూబ్‌లో ఎక్స్‌క్లూజివ్ స్ట్రీమింగ్

దిశ, వెబ్‌డెస్క్: ప్రపంచ వ్యాప్తంగా ఉన్న ‘ఆస్కార్’ (Oscar) లవర్స్‌కు అకాడమీ ఆఫ్ మోషన్ పిక్చర్ ఆర్ట్స్ అండ్ సైన్సెస్ (AMPAS) గుడ్ న్యూస్ చెప్పింది. ఈ మేరకు 2029 నుంచి 2033 వరకు ఆస్కార్ వేడుకలు ఎక్స్‌క్లూసివ్‌గా యూట్యూబ్‌లో స్ట్రీమ్ కానున్నాయి. గూగుల్‌కు చెందిన యూట్యూబ్‌తో అకాడమీ మల్టీ ఇయర్ ఒప్పందం కుదుర్చుకుంది. ఈ ఒప్పందం ప్రకారం ఆస్కార్ వేడుకను మాత్రమే కాకుండా రెడ్ కార్పెట్ ప్రీ-షో, బిహైండ్-ది-సీన్స్ కంటెంట్, గవర్నర్స్ అవార్డ్స్, నామినేషన్స్ అనౌన్స్‌మెంట్, నామినీస్ లంచన్, స్టూడెంట్ అకాడమీ అవార్డ్స్, సైంటిఫిక్ అండ్ టెక్నికల్ అవార్డ్స్ వంటి ఇతర కార్యక్రమాలను కూడా ఆస్కార్స్ యూట్యూబ్ ఛానల్‌లో అందుబాటులోకి తీసుకొస్తుంది.

ఈ సందర్భంగా అకాడమీ సీఈఓ బిల్ క్రామర్ (Bill Kramer), ప్రెసిడెంట్ లినెట్ హావెల్ టేలర్‌ (Lynette Howell Taylor)లు మాట్లాడుతూ.. యూట్యూబ్‌తో ఈ భాగస్వామ్యం ఆస్కార్‌లను ప్రపంచవ్యాప్తంగా అనేక ప్రేక్షకులకు చేరువ అవుతుందని అన్నారు. తమ మెంబర్స్, సినిమా సమాజానికి ఇది ఒక గొప్ప లాభమని అన్నారు. మరోవైపు యూట్యూబ్ సీఈఓ నీల్ మోహన్ (Neil Mohan) మాట్లాడుతూ.. ఆస్కార్‌లు కథలు చెప్పడం, కళాత్మకతను గౌరవించే ముఖ్యమైన సాంస్కృతిక సంస్థ అని అన్నారు. ఈ భాగస్వామ్యం కొత్త తరం సృజనాత్మకత, సినిమా ప్రేమికులను ప్రేరేపిస్తుందని తెలిపారు. తాజా ఒప్పందంతో స్ట్రీమింగ్ ప్లాట్‌ఫామ్‌ల ఆధిపత్యం మరింత బలోపేతం అవుతుందని అని అన్నారు. భవిష్యత్తులో ఆస్కార్ వేడుక చాలా మందికి చేరువ అవుతుందని భావిస్తున్నామని యూట్యూబ్ సీఈఓ నీల్ మోహన్ అన్నారు.