‘పెద్ది’లో ‘చికిరి’ పాటకు మార్పులు.. “సరుకు సామాన్” పదంపై సెన్సార్ అభ్యంతరం?

దిశ, వెబ్ డెస్క్: మెగా పవర్ స్టార్ రామ్ చరణ్, బాలీవుడ్ బ్యూటీ జాన్వీ కపూర్ జంటగా నటించిన ‘పెద్ది’ చిత్రం జూన్ 4వ తేదీన ప్రేక్షకుల ముందుకు రానుంది. దర్శకుడు బుచ్చిబాబు సనా తెరకెక్కించిన ఈ చిత్రానికి ప్రముఖ సంగీత దర్శకుడు ఏఆర్ రెహమాన్ సంగీతం అందించగా, వృద్ధి సినిమాస్ బ్యానర్‌పై నిర్మించారు. ఇప్పటికే విడుదలైన ప్రచార చిత్రాలు, పాటలు సినిమాపై భారీ అంచనాలు పెంచాయి. తాజాగా ఈ సినిమాకు సంబంధించిన సెన్సార్ కార్యక్రమాలు పూర్తైనట్లు సమాచారం. ఈ చిత్రం మూడు గంటలకు పైగా నిడివితో ప్రేక్షకుల ముందుకు రానున్నట్లు టాక్ వినిపిస్తోంది.

అయితే సెన్సార్ బృందం సినిమాలోని కొన్ని పదాల విషయంలో అభ్యంతరాలు వ్యక్తం చేసినట్లు తెలుస్తోంది. అందులో భాగంగా ‘చికిరి’ పాటలోని “సరుకు సామాన్ ” అనే పదాన్ని మార్చాలని సీబీఎఫ్‌సీ (సెంట్రల్ బోర్డ్ ఆఫ్ ఫిల్మ్ సర్టిఫికేషన్) సూచించినట్లు సమాచారం. దీంతో థియేటర్లలో ఈ పాట ప్రసారం సమయంలో ఆ లైన్ స్థానంలో కొత్త పదం లేదా కొత్త లిరిక్ వినిపించే అవకాశం ఉందని తెలుస్తోంది. ప్రస్తుతం ఈ అంశం సోషల్ మీడియాలో హాట్ టాపిక్‌గా మారింది. ఈ సినిమాపై ఇప్పటికే భారీ అంచనాలు నెలకొన్నాయి. మరి ‘పెద్ది’ ఆ అంచనాలను అందుకుని బాక్సాఫీస్ వద్ద ఎలాంటి విజయాన్ని అందుకుంటుందో చూడాలి.