దళపతి విజయ్‌కి మరో భారీ షాక్‌.. ‘జననాయగన్‌’ ఓటీటీ హక్కులను రద్దు చేసిన అమెజాన్‌ ప్రైమ్‌

దిశ, వెబ్‌డెస్క్: కోలీవుడ్ స్టార్ దళపతి విజయ్ నటిస్తున్న భారీ చిత్రం 'జన నాయకన్' (Jana Nayagan)కు ఓటీటీ (OTT) రూపంలో గట్టి ఎదురుదెబ్బ తగిలింది. ప్రముఖ స్ట్రీమింగ్ దిగ్గజం అమెజాన్ ప్రైమ్ వీడియో ఈ సినిమాతో కుదుర్చుకున్న భారీ డీల్‌ను రద్దు చేసుకున్నట్లు సమాచారం. ఈ సినిమా పోస్ట్-థియేట్రికల్ స్ట్రీమింగ్ హక్కులను అమెజాన్ ప్రైమ్ దాదాపు రూ.120 కోట్ల భారీ ధరకు సొంతం చేసుకుంది. అయితే, సెన్సార్ వివాదాల కారణంగా సినిమా విడుదల ఎప్పుడు ఉంటుందనే దానిపై స్పష్టత లేకపోవడంతో, సంస్థ ఈ ఒప్పందం నుండి తప్పుకున్నట్లు తెలుస్తోంది.

సెన్సార్ వివాదం..

ఈ సినిమా 2026 సంక్రాంతికి విడుదల కావాల్సి ఉండగా, ప్రస్తుతం నిరవధికంగా వాయిదా పడింది. సెంట్రల్ బోర్డ్ ఆఫ్ ఫిలిం సర్టిఫికేషన్ (CBFC) ఈ చిత్రానికి సెన్సార్ సర్టిఫికేట్ ఇచ్చేందుకు నిరాకరించింది. సినిమాలోని కొన్ని సన్నివేశాలు మతపరమైన మనోభావాలను దెబ్బతీసేలా ఉన్నాయని, అలాగే సాయుధ దళాలను అభ్యంతరకరంగా చిత్రీకరించారని బోర్డు పేర్కొంది. ప్రస్తుతం ఈ చిత్రం రివైజింగ్ కమిటీ పరిశీలనలో ఉంది. కమిటీ సభ్యులు త్వరలోనే సినిమాను వీక్షించి తుది నిర్ణయం తీసుకోనున్నారు.

సినిమా వివరాలు..

దర్శకుడు హెచ్. వినోద్ తెరకెక్కిస్తున్న ఈ చిత్రం, నందమూరి బాలకృష్ణ నటించిన 'భగవంత్ కేసరి' చిత్రానికి పాక్షిక రీమేక్ (అడాప్టేషన్) అని ప్రచారం జరుగుతోంది. విజయ్ సరసన పూజా హెగ్డే హీరోయిన్‌గా నటిస్తుండగా, బాబీ డియోల్ విలన్ పాత్రలో కనిపిస్తున్నారు. శ్రీలీల ఒరిజినల్‌లో చేసిన పాత్రను మమిత బైజు పోషిస్తున్నారు. కేవీఎన్ (KVN) ప్రొడక్షన్స్ ఈ సినిమాను ప్రతిష్టాత్మకంగా నిర్మిస్తోంది. విజయ్ రాజకీయాల్లోకి రాకముందు నటిస్తున్న చివరి చిత్రం కావడంతో ఈ సినిమాపై భారీ అంచనాలు ఉన్నాయి. మరి ఈ సెన్సార్ చిక్కులు తొలగి సినిమా ఎప్పుడు విడుదలవుతుందో చూడాలి.