ప్రైవేట్ ఆడియో లీక్.. ‘డిలీట్ చేయకపోతే అంతు చూస్తా’ అంటూ నటి రష్మిక స్ట్రాంగ్ వార్నింగ్

దిశ, వెబ్‌డెస్క్: స్టార్ హీరోయిన్ రష్మిక మందన్న తనపై, తన కుటుంబంపై జరుగుతున్న అసత్య ప్రచారాలపై తొలిసారి స్పందించారు. ఈ మేరకు సోషల్ మీడియా వేదికగా కీలక వ్యాఖ్యలు చేశారు. ఇటీవల నటుడు విజయ్ దేవరకొండతో వివాహం జరిగిన కొద్ది రోజులకే, ఆమె తల్లి సుమన్ మందన్నకు సంబంధించిన పాత ఆడియో క్లిప్ సోషల్ మీడియాలో వైరల్ అవ్వడం కలకలం రేపింది. ఈ నేపథ్యంలో రష్మిక ప్రకటనను విడుదల చేస్తూ, తప్పుడు ప్రచారం చేసేవారికి 24 గంటల డెడ్‌లైన్ విధించారు.

వివాదం ఏమిటి?

2016లో 'కిరిక్ పార్టీ' సినిమా సమయంలో రష్మిక, కన్నడ నటుడు రక్షిత్ శెట్టి ప్రేమలో పడి, 2017లో నిశ్చితార్థం చేసుకున్నారు. అయితే 2018లో వారు విడిపోయారు. ప్రస్తుతం వైరల్ అవుతున్న ఆడియోలో.. ఆ సమయంలో రష్మిక ఎదుర్కొన్న వేధింపుల గురించి ఆమె తల్లి మాట్లాడుతున్నట్లు సమాచారం. దాదాపు ఎనిమిదేళ్ల క్రితం నాటి ఈ సంభాషణను, ఇప్పుడు రష్మిక పెళ్లి జరిగిన శుభసమయంలో కావాలనే బయటపెట్టడంపై ఆమె తీవ్ర ఆగ్రహం వ్యక్తం చేశారు.

రష్మిక ఏం అన్నదంటే..?

‘‘గత ఎనిమిదేళ్లుగా మీడియాలోని ఒక విభాగం, కొందరు వ్యక్తులు నాపై అసత్య ప్రచారాలు, వ్యక్తిగత దాడులు చేస్తున్నారు. నేను అనని మాటలను అన్నట్లుగా సృష్టించి, వ్యూస్ కోసం నాపై ద్వేషాన్ని పెంచారు. ఇంతకాలం సహనంతో మౌనంగా ఉన్నాను. గత 24 గంటల్లో జరిగిన పరిణామాలు అన్ని హద్దులనూ దాటేశాయి. ఎనిమిదేళ్ల క్రితం నాటి ఒక ప్రైవేట్ సంభాషణను అనుమతి లేకుండా రికార్డ్ చేసి, అందులోని కొంత భాగాన్ని మాత్రమే తీసుకుని వివాదం సృష్టించారు. ఇది నా వ్యక్తిగత గోప్యతకు (Privacy) భంగం కలిగించడమే. నన్ను విమర్శించడం వదిలేసి, ఇప్పుడు నా కుటుంబాన్ని, నాకు సంబంధం ఉన్న వ్యక్తులను కూడా ఇబ్బందుల్లోకి నెట్టారు. ఒకరి గౌరవాన్ని, ప్రశాంతతను దెబ్బతీస్తూ ద్వేషాన్ని వ్యాప్తి చేయడం దురదృష్టకరం.’’

24 గంటల డెడ్‌లైన్..

ఈ ఆడియో క్లిప్‌ను లేదా దీనికి సంబంధించిన కథనాలను ప్రచారం చేస్తున్న వారు వెంటనే వాటిని తొలగించాలి. ఈ ప్రకటన వెలువడిన 24 గంటల్లోపు వాటిని తొలగించకపోతే, రేపటి నుండి సంబంధిత వ్యక్తులు, సంస్థలపై కఠినమైన చట్టపరమైన చర్యలు (Legal Action) తీసుకుంటాను. ఇది నా గౌరవం కోసం తప్పక తీసుకుంటున్న నిర్ణయం’’ అని రష్మిక తీవ్రంగా స్పందించారు. ఇదిలా ఉంటే.. ప్రస్తుతం రష్మిక చేసిన ఈ ప్రకటన సినీ వర్గాల్లో మరియు సోషల్ మీడియాలో సంచలనంగా మారింది. బాధ్యతారాహిత్యంగా వ్యవహరించే వారిపై ఆమె తీసుకున్న ఈ నిర్ణయానికి నెటిజన్ల నుండి మద్దతు లభిస్తోంది.