అల్లు అర్జున్‌తో సినిమా నిజమే.. సరైన సమయంలో రాబోతుందంటూ బాసిల్ జోసెఫ్ క్లారిటీ

దిశ, సినిమా: మలయాళ దర్శకుడు బాసిల్ జోసెఫ్, అల్లు అర్జున్ కాంబోలో ఓ భారీ ప్రాజెక్ట్ రాబోతున్నట్లు గత కొద్ది కాలంగా వార్తలు వైరల్ అవుతున్న విషయం తెలిసిందే. వీరిద్దరి కాంబోలో ఓ యాక్షన్ డ్రామా వస్తున్నట్లు పుకార్లు షికారు చేస్తున్నాయి. తాజాగా, ఓ ఇంటర్వ్యూలో భాగంగా.. బాసిల్ జోసెఫ్ ఈ విషయాన్ని స్పష్టం చేశారు. ఈ క్రేజీ కాంబోపై వస్తున్న వార్తల గురించి బాసిల్ జోసెఫ్ మాట్లాడుతూ.. అల్లు అర్జున్ లాంటి ఒక పెద్ద స్టార్ హీరోతో సినిమా చేయడం అనేది చాలా పెద్ద విషయమని, దానికి సుదీర్ఘమైన ప్రక్రియ అవసరమని పేర్కొన్నారు. ఇలాంటి భారీ ప్రాజెక్టులను పట్టాలెక్కించాలంటే స్క్రిప్ట్ వర్క్ నుండి ప్రీ-ప్రొడక్షన్ వరకు ఎంతో సమయం, పక్కా ప్రణాళికకావాలని చెప్పారు. ఖచ్చితంగా సరైన సమయం వచ్చినప్పుడు ఈ సినిమా మొదలవుతుందని ఆయన స్పష్టం చేశారు. అయితే ప్రస్తుతానికి ఈ ప్రాజెక్ట్‌కు సంబంధించిన కథ లేదా ఇతర మరిన్ని వివరాలను తాను వెల్లడించలేనని చాలా చాకచక్యంగా సమాధానం ఇచ్చారు. కాగా.. ప్రస్తుతం అల్లు అర్జున్ తన మోస్ట్ అవైటెడ్ మూవీస్ అట్లీ ‘రాకా’, లోకేష్ కనగరాజ్ తెరకెక్కిస్తున్న ‘A-23’ షూటింగ్స్‌లో ఫుల్ బిజీగా ఉండగా.. బాసిల్ జోసెఫ్ కూడా తన తదుపరి చిత్రాల పనుల్లో ఉన్నారు. ఈ ఇద్దరి కాంబినేషన్ సెట్ అయితే మాత్రం ఇండియన్ సినిమా బాక్సాఫీస్ వద్ద సరికొత్త రికార్డులు క్రియేట్ అవ్వడం ఖాయమని ఫ్యాన్స్ భావిస్తున్నారు.