ఎక్స్అఫిషియోలు వద్దని హైకోర్టులో కేసు
దిశ, తెలంగాణ బ్యూరో: ఓటర్లు మున్సిపాలిటీలు, కార్పొరేషన్లల్లో ఓట్లేసి కౌన్సిలర్లు, కార్పొరేటర్లను గెలిపిస్తారు. వారే చైర్మన్/మేయర్ ను ఎన్నుకోవడం ధర్మం. కానీ ఎమ్మెల్యేలు, ఎమ్మెల్సీలు, ఎంపీలంతా ఎక్స్అఫిషియో సభ్యులుగా చేరి ప్రజా తీర్పును మార్చేస్తున్నారు. అందుకే ఈ ఎక్స్అఫిషియో విధానాన్ని రద్దు చేయాలని కోరుతూ హైకోర్టులో కేసు దాఖలైంది. అసెంబ్లీ ఎన్నికల్లో రాష్ట్ర అంశాలు, ఎంపీ ఎన్నికల్లో జాతీయాంశాలతో ఓట్లేస్తారు. అదే పురపాలక సంస్థల్లో స్థానిక అంశాల ప్రాతిపదికనే గెలుపోటములు ఉంటాయి. కానీ వాటికి భిన్నంగా మేయర్/చైర్మన్ ఎన్నికలో ప్రజాప్రతినిధుల హక్కు సరైంది కాదని పిటిషనర్, బాల్కొండ మాజీ ఎమ్మెల్యే ఈరావత్ అనిల్కుమార్ వాదించారు. గురువారం హైకోర్టులో దాఖలు చేసిన పిటిషన్ లో ఇవే అంశాలను ప్రస్తావించారు.
కనీసం ఆ ప్రాంతానికి సంబంధం లేకపోయినా ఎక్స్అఫిషియో సభ్యుడిగా చేరి ఓటర్ల తీర్పుకు భిన్నంగా మేయర్ ను ఎన్నుకుంటున్నారు. ఈ పద్ధతి అప్రజాస్వామికమన్నారు. ఇప్పటికే ఎమ్మెల్యేలు, ఎంపీలు గెలిచి రెండేండ్లు అయ్యింది. ఈ క్రమంలో వారంతా కలిసి మరో ఐదేండ్ల పాటు మేయర్ గా ఉండే ప్రక్రియలో భాగస్వాములవుతున్నారు. పైగా రెండేండ్ల నాటి రాజకీయ పరిస్థితులే ఇప్పుడు లేవు. ఈ క్రమంలో ప్రజల తీర్పు ఆ ఎమ్మెల్యే, ఎంపీలకు వ్యతిరేకంగా ఉండే అవకాశం ఉంది. కానీ వాళ్ల ప్రత్యేకమైన అధికారాన్ని ఉపయోగించుకొని అనుకూల వాతావరణాన్ని సృష్టించడం విడ్డూరంగా ఉందని పిటిషనర్ అన్నారు.
ప్రజలు ఒక పార్టీకి మెజారిటీ ఇచ్చినా మేయర్, చైర్మన్ అయ్యేందుకు ఎక్స్అఫిషియో సభ్యులు అడ్డుకుంటున్నారని ఆవేదన వ్యక్తం చేశారు. మూడేండ్లు మాత్రమే పదవీ కాలంలో ఉండే ప్రజాప్రతినిధులు కలిసి ఐదేండ్లు ఉండే మేయర్/చైర్మన్ ను ఎన్నుకోవడం సమంజసం కాదన్నారు. ఈ పిటిషన్ పై ప్రభుత్వ ప్రధాన కార్యదర్శి, జీహెచ్ఎంసీ కమిషనర్ లకు నోటీసులు జారీ చేసింది. విచారణను వచ్చే నాల్గో తేదీకి వాయిదా వేసింది.
