Zepto: జెప్టో ఐపీఓకు సెబీ గ్రీన్ సిగ్నల్

దిశ, బిజినెస్ బ్యూరో: భారత క్విక్ కామర్స్ రంగంలో వేగంగా ఎదుగుతున్న జెప్టో త్వరలో స్టాక్ మార్కెట్‌లోకి అడుగుపెట్టేందుకు సిద్ధమవుతోంది. కంపెనీ ప్రతిపాదించిన 1 బిలియన్ డాలర్ల ఐపీఓకు మార్కెట్ నియంత్రణ సంస్థ సెబీ అనుమతి ఇచ్చింది. ప్రస్తుతం మార్కెట్లో బ్లింకిట్, స్విగ్గీ ఇన్‌స్టామార్ట్ వంటి దిగ్గజాలతో పోటీ పడుతున్న జెప్టో, జూలై నాటికి మార్కెట్లో లిస్టింగ్ కావాలని లక్ష్యంగా పెట్టుకున్నట్లు సమాచారం. ఈ ఐపీఓలో నిధుల సేకరణ కొత్త షేర్ల జారీ ద్వారా ఉండనున్నట్లు తెలుస్తోంది. గత ఏడాది డిసెంబర్‌లో జెప్టో ఐపీఓ కోసం దరఖాస్తు చేసుకోగా, ఆ సమయంలో కంపెనీ విలువ సుమారు 7 బిలియన్ డాలర్లుగా అంచనా వేశారు. ఇప్పుడు సెబీ ఆమోదం లభించడంతో, వచ్చే 6-7 వారాల్లో అప్‌డేట్ చేసిన పత్రాలను సమర్పించే అవకాశం ఉందని కంపెనీ వర్గాలు చెబుతున్నాయి. ప్రస్తుతం భారతదేశ క్విక్ కామర్స్ మార్కెట్ విలువ 10-11 బిలియన్ డాలర్ల మధ్య ఉండొచ్చని అంచనా. ఈ రంగంలో పెరుగుతున్న వినియోగదారుల డిమాండ్ కారణంగా పెట్టుబడిదారుల ఆసక్తి కూడా మెరుగ్గానే పెరుగుతోంది. గ్లోబల్ మార్కెట్లలో ఒడిదుడుకులు, టెక్, స్టార్టప్ ఐపీఓలపై పెట్టుబడిదారులు అప్రమత్తంగా వ్యవహరిస్తున్న సమయంలో జెప్టో పబ్లిక్ ఆఫర్‌కు రావడం గమనార్హం.