Budget 2026: మధ్యతరగతి, ఉద్యోగుల డిమాండ్లను కేంద్రం నెరవేరుస్తుందా?

దిశ, వెబ్‌డెస్క్: కేంద్ర ఆర్థిక మంత్రి నిర్మలా సీతారామన్ ఫిబ్రవరి 1న వరుసగా తొమ్మిదవసారి కేంద్ర బడ్జెట్‌ను పార్లమెంట్‌లో ప్రవేశపెట్టనున్నారు. బడ్జెట్‌ 2026 సమీపిస్తున్న నేపథ్యంలో మధ్యతరగతి వర్గాల్లో భారీ అంచనాలు నెలకొన్నాయి. బంగారం, వెండి సహా.. ఇతర వస్తువుల ధరలు పెరుగుతుండటంతో.. కేంద్రం వాటిని తగ్గించేలా నిర్ణయాలు తీసుకుంటుందని ఎదురుచూస్తున్నారు. ముఖ్యంగా ఆదాయ పన్ను విషయంలో మరిన్ని రాయితీలు ఇవ్వాలని ఉద్యోగులు, వ్యాపారులు, పెన్షనర్లు ఆశగా ఎదురుచూస్తున్నారు. గత బడ్జెట్‌లో కొత్త పన్ను విధానానికి ప్రభుత్వం పెద్ద ఎత్తున ప్రాధాన్యం ఇచ్చిన నేపథ్యంలో.. ఈసారి కూడా పన్ను చెల్లింపుదారులకు ఉపశమనం కలిగించే నిర్ణయాలు వస్తాయా అన్నది ఆసక్తికరంగా మారింది.

పాత పన్ను విధానంపై అనిశ్చితి

బడ్జెట్‌ 2025లో ప్రభుత్వం కొత్త పన్ను విధానంలో కీలక మార్పులు చేసింది. వార్షిక ఆదాయం రూ.12 లక్షల వరకు ఉన్నవారికి పూర్తిగా పన్ను మినహాయింపు కల్పించింది. అలాగే ఉద్యోగులకు ఇచ్చే స్టాండర్డ్ డిడక్షన్‌ను రూ.75 వేలకు పెంచింది. సెక్షన్‌ 87A కింద ఇచ్చే రిబేట్‌ను కూడా రూ.60 వేల వరకు పెంచడంతో అనేక మంది మధ్యతరగతి పన్ను చెల్లింపుదారులకు పన్ను భారం తగ్గింది. అయితే ఈ ప్రయోజనాలు ఎక్కువగా కొత్త పన్ను విధానాన్ని ఎంచుకున్నవారికే పరిమితమయ్యాయి. పాత పన్ను విధానంలో మాత్రం ఎలాంటి మార్పులు చేయలేదు. దీంతో ప్రస్తుతం పాత పన్ను విధానం భవిష్యత్తుపై అనిశ్చితి నెలకొంది. ప్రభుత్వం ఈ విధానాన్ని పూర్తిగా తొలగిస్తుందా, లేక కొనసాగిస్తూ మరిన్ని రాయితీలు ఇస్తుందా అనే అంశంపై స్పష్టత రావాల్సి ఉంది. గత కొన్నేళ్లుగా సెక్షన్‌ 80C, 80D, హోమ్ లోన్ వడ్డీ మినహాయింపు, NPS ప్రయోజనాల్లో ఎలాంటి పెంపు జరగలేదు. కొత్త విధానంలో వరుసగా రాయితీలు వస్తుండటంతో, పాత విధానాన్ని ఎంచుకున్నవారు నిరాశ వ్యక్తం చేస్తున్నారు.

ఇదిలా ఉండగా.. పన్ను చెల్లింపుదారులు రోజువారీగా ఎదుర్కొంటున్న సమస్యలపై కూడా ప్రభుత్వం దృష్టి పెట్టాలని కోరుతున్నారు. ఐటీ రిటర్న్ రిఫండ్‌ల ఆలస్యం, AISలో పొరపాట్లు, TDS సంబంధిత సమస్యలు, అనవసర నోటీసులు వంటి అంశాలు ప్రజలను ఇబ్బంది పెడుతున్నాయి. ఈ సమస్యలకు పరిష్కారం చూపితే పన్ను వ్యవస్థపై నమ్మకం మరింత పెరుగుతుందని నిపుణులు అభిప్రాయపడుతున్నారు.

ముఖ్యంగా సీనియర్ సిటిజన్లకు కొత్త పన్ను విధానంలో ప్రత్యేక మినహాయింపులు లేకపోవడం విమర్శలకు దారి తీస్తోంది. వృద్ధులకు ప్రత్యేక స్లాబ్స్, ఎక్కువ రిబేట్లు, ఆరోగ్య వ్యయాలకు అదనపు డిడక్షన్లు కల్పించాలని డిమాండ్ పెరుగుతోంది. పెరుగుతున్న వైద్య ఖర్చుల నేపథ్యంలో వృద్ధులకు ఇది ఎంతో అవసరమని నిపుణులు చెబుతున్నారు.

సెక్షన్ 80C, 80D పరిమితులు పెరుగుతాయా?

ఇక మధ్యతరగతి వర్గం ఎక్కువగా కోరుతున్న అంశాల్లో సెక్షన్‌ 80C, 80D పరిమితుల పెంపు ప్రధానంగా ఉంది. ప్రస్తుతం సెక్షన్‌ 80C కింద గరిష్టంగా రూ.1.5 లక్షల వరకు మాత్రమే మినహాయింపు లభిస్తోంది. ఇందులో లైఫ్ ఇన్సూరెన్స్ ప్రీమియం, పీఎఫ్, పీపీఎఫ్, ఈఎల్‌ఎస్‌ఎస్ మ్యూచువల్ ఫండ్స్, పిల్లల ఫీజులు వంటి పెట్టుబడులు చేరుతాయి. అంటే భవిష్యత్ కోసం చేసే పొదుపుపై ప్రభుత్వం ఇచ్చే పన్ను రాయితీ ఇదే. ఈ పరిమితిని పెంచితే ప్రజలు మరింత సేవింగ్స్ చేయడానికి ప్రోత్సాహం లభిస్తుందని నిపుణులు అంటున్నారు.

అలాగే సెక్షన్‌ 80D కింద ఆరోగ్య బీమా ప్రీమియంపై పన్ను మినహాయింపు లభిస్తుంది. ప్రస్తుతం సాధారణంగా కుటుంబానికి రూ.25 వేల వరకు, సీనియర్ సిటిజన్లకు రూ.50 వేల వరకు డిడక్షన్ లభిస్తోంది. అయితే బీమా ప్రీమియాలు, వైద్య ఖర్చులు పెరుగుతున్న నేపథ్యంలో ఈ పరిమితులు సరిపోవడం లేదని ప్రజలు వాపోతున్నారు. అందుకే 80D పరిమితిని పెంచాలని డిమాండ్ చేస్తున్నారు.

స్టాండర్డ్ డిడక్షన్ రూ.12 లక్షల నుంచి రూ.15 లక్షలకు?

బడ్జెట్‌ 2026లో స్టాండర్డ్ డిడక్షన్‌ను రూ.75 వేల నుంచి రూ.1 లక్షకు పెంచాలని, అలాగే పన్ను మినహాయింపు పరిమితిని రూ.12 లక్షల నుంచి రూ.15 లక్షలకు పెంచాలని కూడా మధ్యతరగతి వర్గాలు కోరుతున్నాయి. ఇలా చేస్తే ఉద్యోగులు, పెన్షనర్లు తమ నెలవారీ EMIలు, ఇంటి ఖర్చులు, పిల్లల చదువు ఖర్చులను సులభంగా నిర్వహించగలుగుతారని భావిస్తున్నారు.

ఇళ్ల ధరలు, అద్దెలు పెరుగుతున్న నేపథ్యంలో హోమ్ లోన్ వడ్డీపై ఇచ్చే సెక్షన్‌ 24(b) డిడక్షన్‌ను పెంచాలని, HRA పరిమితులను కూడా సవరించాలని ఉద్యోగులు కోరుతున్నారు. ముఖ్యంగా మెట్రో నగరాల్లో నివసించే వారికి ఇది పెద్ద ఊరటగా మారనుంది. దీర్ఘకాలిక పొదుపును ప్రోత్సహించేందుకు NPS, ఆరోగ్య బీమా, సార్వభౌమ గోల్డ్ బాండ్లపై మరిన్ని పన్ను ప్రయోజనాలు ఇవ్వాలని డిమాండ్ పెరుగుతోంది. ముఖ్యంగా SGBలను తిరిగి ప్రారంభించాలని పెట్టుబడిదారులు కోరుతున్నారు.

ప్రస్తుతం కొత్త పన్ను విధానంలో రూ.12 లక్షల వరకు పన్ను మినహాయింపు ఉన్నప్పటికీ, ద్రవ్యోల్బణం పెరుగుతున్న నేపథ్యంలో దీన్ని రూ.15 లక్షలకు పెంచాలని ప్రజలు ఆశిస్తున్నారు. ప్రభుత్వం దీనిపై సానుకూలంగా స్పందిస్తే మధ్యతరగతికి భారీ ఊరట లభించే అవకాశం ఉంది. నిపుణుల అభిప్రాయం ప్రకారం.. డిడక్షన్లు పెద్దగా లేని వారికి కొత్త పన్ను విధానం అనుకూలంగా ఉంటుంది. అయితే ఇన్సూరెన్స్, హోమ్ లోన్, సేవింగ్స్ ఉన్నవారికి ఇప్పటికీ పాత పన్ను విధానమే లాభదాయకంగా ఉంది. కొత్త విధానంలో కొంతమేర డిడక్షన్లు జోడిస్తే ఈ తేడా తగ్గే అవకాశం ఉంది.

మొత్తంగా చూస్తే బడ్జెట్‌ 2026లో ప్రభుత్వం పన్ను విధానంలో సరళత, స్పష్టత, స్థిరత్వంపై దృష్టి పెట్టే అవకాశం ఉంది. పాత విధానాన్ని కొనసాగిస్తుందా, లేక పూర్తిగా కొత్త విధానానికే ప్రాధాన్యం ఇస్తుందా అన్నది ఈ బడ్జెట్‌లో తేలనుంది. మధ్యతరగతి వర్గాలు మాత్రం తమపై పన్ను భారం తగ్గించే నిర్ణయాల కోసం ఆశగా ఎదురుచూస్తున్నాయి.