డాలర్పై రూపాయి పైచేయి: ఆర్బీఐ కీలక నిర్ణయంతో పెరిగిన విలువ
ఆర్బీఐ తీసుకున్న కీలక నిర్ణయంతో డాలర్ వద్ద రూపాయి బలపడింది.
దిశ, వెబ్డెస్క్: అంతర్జాతీయ ఫారెక్స్ మార్కెట్లో అమెరికన్ డాలర్తో పోలిస్తే భారత రూపాయి శుక్రవారం ట్రేడింగ్లో గణనీయమైన బలాన్ని చాటింది. రిజర్వ్ బ్యాంక్ ఆఫ్ ఇండియా (RBI) తీసుకున్న ఒక వ్యూహాత్మక చర్య రూపాయి విలువ పెరగడానికి ప్రధాన కారణమైంది. సాధారణంగా ప్రభుత్వ రంగ చమురు శుద్ధి సంస్థలు తమ దిగుమతుల కోసం మార్కెట్ నుండి నేరుగా డాలర్లను కొనుగోలు చేస్తుంటాయి. దీనివల్ల డాలర్కు డిమాండ్ పెరిగి రూపాయిపై ఒత్తిడి పెరుగుతుంది. అయితే.. ఈసారి అలా కాకుండా ఒక ప్రత్యేక క్రెడిట్ లైన్ను ఉపయోగించుకోవాలని ఆర్బీఐ ఆదేశించడంతో, బహిరంగ మార్కెట్లో డాలర్లకు డిమాండ్ తగ్గి రూపాయి విలువ 25 పైసలు లాభపడి 92.95 వద్ద స్థిరపడింది.
మరోవైపు.. అంతర్జాతీయ భౌగోళిక రాజకీయ పరిణామాలు కూడా రూపాయికి అనుకూలంగా మారాయి. ముఖ్యంగా పశ్చిమ ఆసియాలో ఇజ్రాయెల్ - లెబనాన్ మధ్య కాల్పుల విరమణ ఒప్పందం కుదిరిందన్న వార్తలు, అలాగే అమెరికా-ఇరాన్ చర్చలలో పురోగతి కనిపిస్తుందన్న అంచనాలు ప్రపంచవ్యాప్తంగా మదుపర్లలో నమ్మకాన్ని నింపాయి. దీనికి తోడు దేశీయ ఈక్విటీ మార్కెట్లు సానుకూలంగా ప్రారంభం కావడంతో రూపాయికి మరింత మద్దతు లభించింది. అయితే.. గ్లోబల్ మార్కెట్లో డాలర్ ఇండెక్స్ ఇప్పటికీ బలంగానే ఉండటంతో రూపాయి లాభాలు కొంతమేర పరిమితమయ్యాయి.
ఇక కమోడిటీ మార్కెట్ విషయానికి వస్తే.. అంతర్జాతీయంగా ముడిచమురు ధరలు పతనమవ్వడం భారత్ వంటి దిగుమతి చేసుకునే దేశాలకు ఊరటనిస్తోంది. బ్రెంట్ క్రూడ్ బ్యారెల్కు ఒక శాతం తగ్గి 97.99 డాలర్ల వద్ద, యూఎస్ డబ్ల్యూటీఐ దాదాపు రెండు శాతం తగ్గి 92.91 డాలర్ల వద్ద ట్రేడవుతున్నాయి. ఇదే సమయంలో విలువైన లోహాలైన బంగారం, వెండి ధరల్లో మాత్రం తీవ్ర ఒడిదుడుకులు కనిపిస్తున్నాయి. జూన్ 5 నాటి గోల్డ్ ఫ్యూచర్స్ రూ.1,53,250 వద్ద కొనసాగుతుండగా, మే 5 నాటి వెండి ధరలు ఏకంగా 0.83 శాతం పెరిగి రూ. 2,50,716 గరిష్ట స్థాయిని తాకడం విశేషం. మార్కెట్ నిపుణుల విశ్లేషణ ప్రకారం, ధరలు మరింత పుంజుకోవాలంటే కీలకమైన నిరోధక స్థాయిలను దాటాల్సి ఉంటుంది.
