Forex Kitty: బంగారం విలువ పెరగడంతో విదేశీ మారక నిల్వల్లో వృద్ధి

దిశ, బిజినెస్ బ్యూరో: భారత విదేశీ మారక నిల్వలు ఒక్క వారంలోనే 963 మిలియన్ డాలర్లు పెరిగి 671.63 బిలియన్ డాలర్లకు చేరాయని భారతీయ రిజర్వ్ బ్యాంక్ (ఆర్‌బీఐ) వెల్లడించింది. తాజాగా విడుదల చేసిన గణాంకాల ప్రకారం, జూన్ 19తో ముగిసిన వారంలో బంగారం నిల్వల విలువ 4.1 బిలియన్ డాలర్లు పెరిగి 107.93 బిలియన్ డాలర్లకు చేరింది. అదే సమయంలో విదేశీ కరెన్సీ ఆస్తులు (ఎఫ్‌సీఏలు) 3.07 బిలియన్ డాలర్లు తగ్గి 541.21 బిలియన్ డాలర్లకు పడిపోయాయి. అయినప్పటికీ, గోల్డ్ రిజర్వుల పెరుగుదల ఆ తగ్గుదలను పూర్తిగా భర్తీ చేసి మొత్తం విదేశీ మారక నిల్వలను వృద్ధి దిశలో నిలబెట్టింది. ఇక స్పెషల్ డ్రాయింగ్ రైట్స్ (ఎస్‌డీఆర్‌లు) 52 మిలియన్ డాలర్లు తగ్గి 18.64 బిలియన్ డాలర్లకు చేరగా, అంతర్జాతీయ ద్రవ్య నిధి (ఐఎంఎఫ్) వద్ద భారత నిల్వలు కూడా స్వల్పంగా తగ్గి 4.79 బిలియన్ డాలర్లుగా నమోదయ్యాయి. అంతకుముందు వారాలతో పోలిస్తే ఫారెక్స్ కిట్టీలో స్వల్ప హెచ్చుతగ్గులు కనిపిస్తున్నప్పటికీ, భారత విదేశీ మారక నిల్వలు ఇప్పటికీ ప్రపంచంలోనే అత్యంత బలమైన నిల్వల్లో ఒకటిగా కొనసాగుతున్నాయి. ఇవి రూపాయి విలువను స్థిరంగా ఉంచడంలో, దిగుమతుల అవసరాలను తీర్చడంలో, అంతర్జాతీయ ఆర్థిక ఒడిదుడుకులను ఎదుర్కోవడంలో కీలక రక్షణ కవచంగా పనిచేస్తున్నాయని విశ్లేషకులు తెలిపారు. మార్కెట్ పరిస్థితులను నిరంతరం పర్యవేక్షిస్తున్న ఆర్‌బీఐ, అవసరమైతే మాత్రమే విదేశీ మారక మార్కెట్లో జోక్యం చేసుకుంటుందని మరోసారి స్పష్టం చేసింది.