World Bank: భారత వృద్ధి రేటును తగ్గించిన వరల్డ్ బ్యాంక్
ప్రస్తుత పరిస్థితుల మధ్య దేశ వృద్ధి రేటు ప్రతికూల దిశలో ఉందని వరల్డ్ బ్యాంక్ హెచ్చరించింది.
దిశ, బిజినెస్ బ్యూరో: పెరుగుతున్న ప్రపంచ అనిశ్చితులు, దేశీయ సవాళ్ల నేపథ్యంలో భారత వృద్ధి రేటును వరల్డ్ బ్యాంక్ తగ్గించింది. ప్రస్తుత ఆర్థిక సంవత్సరానికి మన ఆర్థికవ్యవస్థ 6.6 శాతం మేర వృద్ధిని సాధించవచ్చని అంచనా వేసింది. ప్రస్తుత పరిస్థితుల మధ్య దేశ వృద్ధి రేటు ప్రతికూల దిశలో ఉందని వరల్డ్ బ్యాంక్ హెచ్చరించింది. ఊహించిన దానికంటే నెమ్మదిగా వృద్ధి ఉండవచ్చని, ఇందుకు ప్రధానంగా మధ్యప్రాచ్యానికి (ముఖ్యంగా ఇరాన్తో) సంబంధించిన భౌగోళిక రాజకీయ సమస్యలు, హార్ముజ్ జలసంధిలో నౌకల రవాణాకు ఉన్న ఇబ్బందులు కారణాలని వరల్డ్ బ్యాంక్ తన తాజా 'గ్లోబల్ ఎకనామిక్ ప్రాస్పెక్ట్స్' నివేదికలో పేర్కొంది. ఈ రెండూ భారత చమురు దిగుమతుల బిల్లును పెంచుతాయి, ద్రవ్యోల్బణంపై ఒత్తిడిని పెంచుతాయి, మరియు అధిక ధరల ద్వారా భారతదేశ కరెంట్ ఖాతా లోటుపై ప్రతికూల ప్రభావాన్ని చూపుతాయి. ఇవి కాకుండా గ్లోబల్ డిమాండ్ బలహీనంగా ఉండటం, ఆర్థిక మార్కెట్లలో నెలకొన్న అస్థిరత, ప్రైవేట్ పెట్టుబడులలో రికవరీ తక్కువగా ఉండటం వంటి అంశాలు భారత వృద్ధికి ఆటంకంగా ఉన్నాయని వరల్డ్ బ్యాంకు పేర్కొంది.
