ఐఫోన్ వాడతారా? ఆండ్రాయిడ్ వాడతారా? ఇంటర్వ్యూలో 3 వేల మందికి ఇదే ప్రశ్న!

దిశ, వెబ్ డెస్క్: సాధారణంగా ఇంటర్వ్యూలలో అభ్యర్థుల విద్యార్హతలు, వర్క్ ఎక్స్‌పిరియెన్స్, స్కిల్స్ వంటి అంశాలపై ప్రశ్నలు అడుగుతుంటారు. అలాగే, రెజ్యూమ్‌లో ఉన్న వివరాలు, టెక్నికల్ పరిజ్ఞానం ఆధారంగా అర్హతలను నిర్ణయించడం సాధారణ పద్ధతి. కానీ Indeed కంపెనీ సీఈఓ క్రిస్ హయమ్స్ (Chris Hyams) ఈ సంప్రదాయానికి భిన్నంగా, వినూత్నమైన విధానంతో అభ్యర్థులను అంచనా వేయడం ప్రారంభించారు. ఇందులో భాగంగా, గత 15 సంవత్సరాలుగా ఆయన 3,000 మందికిపైగా ఇంటర్వ్యూకు వచ్చిన అభ్యర్థులను ఒకే ప్రశ్నతో పరీక్షించారు. 'మీరు iPhone వాడతారా, Android వాడతారా? ఎందుకు?' ఈ విషయాన్ని ఆయన ఇటీవల Fortune మ్యాగజైన్ ఇంటర్వ్యూలో వివరించారు.

ఈ ప్రశ్న వినగానే ఇంటర్వ్యూకు వచ్చిన అభ్యర్థులు ఆశ్చర్యానికి గురవుతారని, కానీ కొద్దిసేపటికి సమాధానం ఇవ్వడం ప్రారంభిస్తారని హయమ్స్ తెలిపారు. చాలా మందికి ఈ ప్రశ్న సాధారణంగానే అనిపించినా, దాని వెనక లోతైన ఉద్దేశ్యం ఉందన్నారు. 'అభ్యర్థి ఎలా ఆలోచిస్తాడు, ఎలా నిర్ణయాలు తీసుకుంటాడు, ఎందుకు ఒక ఎంపికను చేయనున్నాడు అన్నదే నాకు ముఖ్యం' అని ఆయన పేర్కొన్నారు. ఈ ప్రశ్న ద్వారా అభ్యర్థుల లాజిక్, విశ్లేషణా సామర్థ్యం, అలవాట్లు, అభిరుచులు వంటి అంశాలను తెలుసుకునే అవకాశం లభిస్తుందని తెలిపారు.

అభ్యర్థులు తమ మొబైల్ ఫోన్ ఎంపిక వెనుక కారణాలను వివరించటం ప్రారంభించిన తర్వాత, హయమ్స్ వారిని మరింత లోతుగా అర్థం చేసుకునేందుకు వారు వాడే యాప్స్, ఇష్టపడే ఫీచర్లు, మారాలనుకునే అంశాలు వంటి విషయాలపై చర్చిస్తారు. ఈ ఒక్క అంశం మీదే దాదాపు 15 నిమిషాల పాటు సంభాషణ జరుగుతుందని ఆయన తెలిపారు. ఈ విధంగా, క్రిస్ హయమ్స్ అభ్యర్థుల వ్యక్తిత్వాన్ని, ఆలోచనా విధానాన్ని విశ్లేషించేందుకు ఒక చిన్న ప్రశ్నను ఆధారంగా చేసుకుని, ఇంటర్వ్యూకు కొత్త అభిముఖత తీసుకువచ్చారు.